आफु संयोजक रहेको समितिका सदस्यलाई पौडेलले भने, ‘अपरान्ह ४ बजे बालुवाटार आउनू’

१७ जेठ, काठमाडौं । नेपाली कांग्रेसका वरिष्ठ नेता तथा समितिका संयोजक रामचन्द्र पौडेलले सत्ता गठबन्धनको निर्वाचन तयारी तथा अनुगमन समितिको बैठक बोलाएका छन् । नेता पौडेलले संयोजकका हैसियतले समितिको बैठक बोलाएका हुन् ।

प्रधानमन्त्रीको सरकारी निवास बालुवाटारमा बस्ने बैठकमा स्थानीय तह निर्वाचन, जिल्ला समन्वय समिति निर्वाचन र बजेटको समीक्षसहित आगामी दिनमा समितिले गर्ने कामका विषयमा छलफल हुनेछ ।

७७ जिल्लामा हुने जिल्ला समन्वय समिति निर्वाचनमा गठबन्धन कुन रुपमा जाने भन्नेबारे नेताहरुले छलफल गर्नेछन् । कार्यपालिका गठन हुन बाँकी स्थानीय तहका विषयमा कसरी सहमति गरेर जाने र कस्तो खाकामा अगाडी बढ्ने भन्नेबारे पनि छलफल हुनेछ ।

सोमबार बसेको सत्ता गठबन्धनका शीर्ष नेताको बैठकले निर्वाचनको समीक्षा गर्दै आसन्न जिसस निर्वाचनमा पनि गठबन्धन गर्न तल्ला तहलाई निर्देशन दिएको थियो । यस विषयमा आजको बैठकले पनि छलफल गरी निर्देशन दिनेछ ।