एमाले सरकार अधिकारी नेतृत्वमा बनेको हो, ओली नेतृत्वमा बनेको छैन्ः वेदुराम भुसाल

१८ जेठ, काठमाडौं । नेकपा एकिकृत समाजवादीका महासचिव एवं राष्ट्रिय सभा सदस्य वेदुराम भुसालले केपी ओली नेतृत्वको एमाले सरकार नबनेको दावी गरेका छन् । उनले २०५१ सालमा मनमोहन अधिकारीको नेतृत्वमा बनेको सरकारमात्रै एमालेको भएको बताएका छन् ।

बुधबार राष्ट्रिय सभामा सरकारले जेठ १५ गते प्रस्तुत गरेको आगामी आर्थिक वर्ष २०७९/०८० को बजेटमाथिको छलफलमा बोल्दै सांसदहरुले केपी ओली नेतृत्वको एमालेको सरकार भनेकोप्रति टिप्पणी गर्दै ओली नेतृत्वमा नेकपा एमालेको एकल सरकार अहिलेसम्म नबनेको बताए ।

उनले मनमोहनको नेतृत्वको बाहेक एमालेका गठबन्धनबिनाका कुनै एकल सरकार नरहेको बताउँदै भनने, ‘केही साथीहरूले केपी ओली नेतृत्वको एमाले सरकार भन्नु भो । कहिले थियो इतिहासमा ? केपी ओली पहिलोपटक प्रधानमन्त्री हुनुभएको २०७२ सालको असोज २२ गतेदेखि २०७३ साउन १९ सम्म । त्यतिबेलाको सरकार एमाले र माओवादीको संयुक्त सरकार थियो ।’

उनले ओली दोस्रो पटक २०७४ फागुन ३ गते प्रधानमन्त्री भएको र २०७८ असार २१ गतेसम्म कायम रहेको बताए । उनले भने, ‘पार्टी एकतापछि नेकपाको सरकार बनेको थियो । यो घामजत्तिकै उज्यालोलाई छेकेर छेकिन्छ र ? केपी ओलीजीले यस्तो गर्नुभएको थियो, केपी ओली नेतृत्वको एमाले सरकार कहिल्यै थिएन, होइन । एमालेको एकल सरकार २०५१ सालमा मनमोहन अधिकारीको नेतृत्वमा मात्रै थिया ।’