ठूला मुद्दाको चापमा सर्वोच्च, कार्यक्रममा दलका नेताभन्दा व्यस्त भए न्यायाधीश

१९ जेठ, काठमाडौं । बुधबार कायममुकाय प्रधानन्यायाधीश दीपककुमार कार्की जुम्लामा देखिए । जुम्लामा द्वन्द्वकालमा जलेर नष्ट भएका सुर्खेत-जुम्ला उच्च अदालत र जिल्ला अदालत जुम्लाको दुई वटा भवनको उद्घाटनका क्रममा कार्की त्यहाँ पुगेका हुन् । कार्की केही दिन अघि पनि पश्चिमतिरै पुगेका थिए ।

उनीसहित ८ जना अरु न्यायाधीश अहिले सर्वोच्चमा छैनन् । केही दिन यता कम संख्यामा न्यायाधीशको उपस्थितिले मुद्दामा चाप पनि देखिएको छ । बुधबार २ सय ३० थान मुद्दा पेसीमा चढेका थिए । तर, १० जना न्यायाधीशमा सीमित रहेको सर्वोच्चले सबै मुद्दा हेर्न सकेन ।

अहिले मात्र हैन नयाँ आर्थिक वर्ष सुरु हुन लाग्दा सर्वोच्चमा केही दिन न्यायाधीशको संख्या कम नै हुने कर्मचारीहरु बताउँछन् । अहिले पनि बाँकी रहेको वार्षिक बिदा सिध्याउने बहानामा केही दिन यता सर्वोच्च अदालतमा न्यायाधीशहरुको संख्या कम भएर मुद्दामा असर परेको उनीहरुको भनाई छ ।

कानूनत सर्वोच्च अदालतमा प्रधानन्यायाधीशसहित २१ जना न्यायाधीशको दरबन्दी छ । बेला बेलामा संविधान संशोधन गरी न्यायाधीशको संख्या बढाउने भनिएपनि अहिलेसम्म भएको छैन् । दुई जना नयायाधीशको कार्यकाल सकिएपछि सर्वोच्चमा यतिबेला जम्मा १८ जना न्यायाधीश मात्र छन् ।

खालिरहेका दुई सिटमा न्यायाधीश सिफारिस भएका छैनन् । भएका १८ जनामध्ये ईश्वरप्रसाद खतिवडा बिरामी छन् भने अरु ७ जना कोही विदेश भ्रमणमा र कोही अनुगमनदेखि भवन उद्घाटनमा निस्किएका छन् । जुम्ला पुगेका कामु प्रधानन्यायाधीश कार्कीले न्यायपालिका जनताको आस्थाको धरोहर भएको भन्दै सर्वोच्च अदालतले जनपक्षीय न्याय थप सुदृढ गर्न काम सुरु गरेको बताएका थिए ।

सर्वोच्च अदालत प्रशासन कर्मचारीका अनुसार कामु प्रधानन्यायाधीश दीपककुमार कार्की र वरिष्ठतम् न्यायाधीश हरिकृष्ण कार्की जुम्लामा जिल्ला अदालतको भवन उद्घाटनका लागि गएका हुन् । न्यायाधीश अनिलकुमार सिन्हा जिल्लाको अनुगमनको क्रममा पोखरामा छन् । न्यायाधीश आनन्दमोहन भट्टराई अमेरिकामा छन् भने सपना प्रधान मल्ल, हरिप्रसाद फुयाँल र नहकुल सुवेदी मालदिभ्समा छन् ।