विपक्षी एमालेले भन्यो,‘राणाबिरुद्धको महाभियोग छलफलका लागि चाँडो समितिमा पठाउ’

२४ जेठ, काठमाडौं । नेकपा एमालेले प्रधानन्यायाधीश चोलेन्द्र शम्शेर जबराविरुद्ध लगाएको महाभियोग प्रस्ताव तत्काल महाभियोग सिफारिस समितिमा पठाउन माग गरेको छ । मंगलबार बसेको प्रतिनिधिसभा कार्यव्यवस्थाको बैठकमा एमालेका प्रतिनिधिले महाभियोग प्रस्ताव सिफारिस समितिमा पठाउन माग गरेका हुन् ।

कार्यव्यवस्था समितिमा एमालेकी सचेतक शान्ता चौधरी र सांसद खगराज अधिकारीले प्रधानन्यायाधीशविरुद्धको प्रस्ताव महाभियोग सिफारिस समितिमा पठाउन माग समितिका एक सदस्यले जानकारी दिएका छन् ।

प्रधानन्यायाधीश जबराविरुद्ध गत फागुन १ गते सत्तारुढ कांग्रेस माओवादी केन्द्र र एकीकृत समाजवादीका सांसदले महाभियोग प्रस्ताव संघीय संसद् सचिवालयमा दर्ता गराएका थिए । प्रधानन्यायाधीशविरुद्ध महाभियोग आएपछि प्रतिनिधिसभाले फागुन तेस्रो साता महाभियोग सिफारिस समिति गठन गरेको थियो ।

समितिमा कांग्रेसका मीनबहादुर विश्वकर्मा र रामबहादुर विष्ट, माओवादी केन्द्रका यशोदा सुवेदी र रेखा शर्मा रहेका छन् भने एमालेबाट विष्णु पौडेल, लालबाबु पण्डित, शिवमाया तुम्बाहाम्फे र कृष्णभक्त पोखरेल सदस्य रहेका छन् । एकीकृत समाजवादीबाट कल्याणी खड्का, जसपाबाट प्रमोद साह र लोसपाबाट एकवाल मियाँ रहेका छन् ।

समिति बनेपछि एक पटक मात्रै बैठक बसेको छ भने महाभियोगको प्रस्ताव नआउँदा काम अगाडि बढ्न नसकेको बताइएको छ । समितिको बैठक नबस्दा निलम्बनमा रहेका प्रधानन्यायाधीश जबरामाथि लागेका आरोपको छानबिन भएको छैन ।