विश्वकर्माले गृहमन्त्रीलाई भने ‘हाम्रा कैदीबन्दी रिहा गर्नुपर्यो’

२५ जेठ काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा) का प्रवक्ता खड्गबहादुर विश्वकर्माले गृहमन्त्री बालकृष्ण खाँणसँग भेट गरी यसअघि भएको सहमति अनुसार आफ्ना पार्टीका कार्यकर्ता रिहा गरिदिन आग्रह गरेका छन् ।

बुधबार बिहान गृह मन्त्रालयमा भएको भेटमा गृहसचिव टेकनारायण पाण्डे र मन्त्रालयका प्रवक्ता सहसचिव फणिन्द्रमणि पोखरेल पनि सहभागी थिए । त्यसक्रममा यसअघिका वार्तामा भएका सहमतिपछि भएका कामको लेखाजोखा र समीक्षा भएको थियो ।

गृहमन्त्री खाँणले स्थानीय तह निर्वाचनपूर्व केही कैदीबन्दीलाई रिहा गर्न भएको सहमतिअनुरूप प्रक्रिया अगाडि बढेको जानकारी दिए । स्थानीय निर्वाचनपूर्व केही कैदीबन्दीलाई रिहा गर्न भएको सहमतिअनुरूप प्रक्रिया अगाडि बढेको थियो ।
बैठकमा प्रवक्ता विश्वकर्माले कैदीबन्दी रिहा गर्ने प्रक्रिया कहाँ पुग्यो भनेर जिज्ञासा राखेका थिए । अर्को बैठक सम्बन्धित मन्त्रालय र निकायका प्रतिनिधिहरूको समेत सहभागितामा छिट्टै बस्ने सहमति भएको बताइएको छ ।