बन्चरेडाँडामा फोहोर बोकेका गाडी अलपत्र, संसदमा कांग्रेस र एमालेको जुहारी

२५ जेठ, काठमाडौं । धादिङको बन्चरेडाँडाका स्थानीयले फोहोर विसर्जनमा अवरोध गरिरहेका बेला नीति निमार्णको मुख्य थलो संसद भने यतिबेला सत्ता पक्ष र विपक्षको जुहारी खेल्ने र एकले अर्कालाई आरोप लगाएर पन्छिने थलोका रुपमा विकसित भइरहेको छ ।

विगतदेखि उपत्यकाको मुल समस्याको रुपमा रहेको फोहोर व्यवस्थापनमा दुवै पक्षको ध्यान जान सकेको छैन् । यसको लागि सबै राजनीतिक दल एक ठाउँमा बसेर निकास दिने विषयमा एकत्रित हुन सकिरहेका छैनन् । दुई दिनदेखि बन्चरेडाँडामा काठमाडौंको फोहोर विसर्जन गर्न स्थानीयले अवरोध गर्दा काठमाडौं महानगरपालिका अलमलमा परेको छ ।

यता, प्रतिनिधिसभाको जारी बैठकमा प्रमुख प्रतिपक्षी नेकपा एमालेले काठमाडौंको फोहोर व्यवस्थापनमा भएको सहमतिबारे जानकारी माग्दै तत्काल मन्त्री आएर जवाफ दिन माग गरेको छ । सहमति भएर पनि फोहोर नउठेको र काठमाडौं अझै गन्हाइरहेको भन्दै एमाले सांसदले शहरी विकासमन्त्री रामकुमारी झाँक्रीसँग जवाफ मागेको हो ।

एमालेको मागपछि नेपाली कांग्रेसका सांसद गगन थापाले पनि काठमाडौं उपत्यकाको फोहोर व्यवस्थापनमा प्रधानमन्त्री शेरबहादुर देउवाले नै पहलकदमी लिन माग गरेका छन् । बुधबार प्रतिनिधिसभाको शून्य समयमा बोल्दै उनले शहरी विकास मन्त्रालय र काठमाडौं महानगरपालिकाले मात्र फोहोर व्यवस्थापन गर्न नसक्ने भन्दै उनले प्रधानमन्त्रीलाई पहलकदमी लिन माग गरेका हुन् ।

सांसद थापाले कुहिने र नकुहिने फोहोर घरबाटै छुट्याउनुपर्ने भन्दै काठमाडौंबासीलाई आग्रह गरेका छन् । उनले काठमाडौं उपत्यकाका अन्य नगरपालिकाले पनि फोहोर व्यवस्थापनमा सहयोग गर्न पनि सुझाव दिए । त्यसअघि काठमाडौंमा रहेका कूटनीति नियोगले काठमाडौंका शहरमा थुप्रिएका फोहोरबाट संक्रमणको जोखिम देखिएको भन्दै अनावश्यक हिँडडुल नगर्ने आन्तरिक सर्कुलर जारी गरेको एमाले सांसदले संसदलाई जानकारी गराएका थिए ।

प्रतिनिधिसभा बैठकको विशेष समयमा बोल्दै एमाले सांसद कृष्णगोपाल श्रेष्ठले काठमाडौंका शहरमा थुप्रिएका फोहोरबाट सम्भावित संक्रमणको जोखिमबाट जोगिन अनावश्यक हिँडडुल नगर्न आन्तरिक सर्कुलर जारी गरेको जानकारी दिए । यसले नेपालको छविमा आँच आएको र फोहोर व्यवस्थापन गर्न सरकार मौन बसेको भन्दै उनले अब काठमाडौंबासी चुप लागेर नबस्ने चेतावनी दिए ।

निर्वाचनको अवधिभर धर्य गरेका काठमाडौंवासी शहर नै दुर्गन्ध हुने गरी फोहोर थुप्रिँदासमेत सरकार मौन बसेको भन्दै आक्रोश व्यक्त गरे । उनले प्रत्येक ५०–५० मिटरमा फोहोरको डंगुर र थुप्रो भइरहेको भन्दै जवाफ माग गरे । काठमाडौंका जनताले गरिरहेको धिरताको ख्याल गरेर सरकारले समयमा ख्याल गर्नुपर्ने चेतावनी उनको छ ।