बन्चरेमा काम लागेन बल प्रयोग, बाह्र सय मेट्रिक टन फोहोर काठमाडौं फर्किदा लोडिङ साइडमै समस्या

२६ जेठ काठमाडौं । बिहीबार पनि बिहानैदेखि काठमाडौंका सडक र घरका पेटीमा राखिएको फोहोर उठाएर लोडिङ साइडमा लगिएको छ । सामान्य वर्षा भइरहेकाले भित्री सडकहरुमा हिलो र दुर्गन्ध उस्तै छ ।

फोहोर व्यवस्थापनमा खटिएका महानगर कर्मचारीका अनुसार बुधबार फर्किएको फोहोर गाडीमै लोड भइरहेकाले आज संकलन गरेको फोहोर लोडिङ साइडमा राख्ने ठाउँसमेत छैन ।

उता, बिहीबार बिहानदेखि नै बन्चरेडाँडा स्यानिटरी ल्यान्डफिल साइटमा जाने सडक स्थानीयले अवरुद्ध गराएका छन् । आन्दोलनको स्वरुप परिवर्तन गर्दै बाटो खोल्न जाने सुरक्षाकर्मीलाई माथि र परैबाट धपाउने उनीहरुको योजना छ ।

महानगरपालिकाका कर्मचारीलाई स्थानीयले फोहोरका गाडी नपठाउन र पठाएमा दुर्घटना हुने चेतावनी दिएका छन् । दुबै पक्षबीच झडप तनाव हुने स्थिति देखिएपछि आज सुरक्षाकर्मीको संख्या दोब्बर बनाउने सरकारी पक्षको तयारी भएको बताइएको छ ।

बुधबार स्थानीयको अवरोध हटाउन र फोहोर बोकेका ट्रकको सुरक्षाका लागि नेपाल प्रहरी र सशस्त्रका गरी २ सयभन्दा बढी सुरक्षाकर्मी खटाइएका थिए । स्थानीयको ढुंगा र बोतल प्रहारबाट केही प्रहरी घाइते भएका छन् र उनीहरुको उपचार भइरहेको छ ।

फोहोर लिएर बन्चरेडाँडा स्यानिटरी ल्यान्डफिल साइटमा गएका ट्रकहरु स्थानीयबासीले काठमाडौंनै फर्काइदिए । काठमाडौं महानगरपालिकाले दिएको जानकारी अनुसार बुधबार करिब डेढ सय ट्रक फोहोर बिसर्जन गर्न गएका थिए । उपत्यकाका सडकमा छरिएका फोहोर उठाएर बन्चरेडाँडा गएका ट्रकले फोहोर फाल्न पाएनन् ।

मंगलबार उपत्यकाबाट गएका १ सय ५७ ट्रकको फोहोर ल्यान्डफिल साइटमा सुरक्षाकर्मीले पुर्याएका थिए । स्थानीयले बुधबार विहान सुरक्षाकर्मीले माइकिङ गर्नुअघि नै आन्दोलनको रुप परिवर्तन गरी माथि डाँडामा प्रतिकारका लाति तम्तयार भइसकेका थिए ।

सरकारले मंगलबारबाट स्थानीयको सहमतिबेगर बञ्चरेडाँडा डम्पिङ साइटमा काठमाडौंको फोहोर फाल्न सुरू गरेको हो । प्रहरी र सशस्त्र परिचालन गरेर मंगलबार दिनभरिमा डेढ सय ट्रकभन्दा बढी फोहोर फालिएको थियो । अवराेध गर्ने तीस जनाभन्दा बढीलाई पक्राउ गरिएको स्थानीय बताउँछन् । बुधबार यही घटना दोहोरिने आकलन गर्दै बञ्चरेडाँडाका स्थानीय बिहानै घर छाडेका थिए ।

बञ्चरेको डम्पिङ साइट वरिपरि डाँडाले घेरिएको गहिरो खाल्डोमा छ । त्यही खाल्डोतिर झर्ने बाटोमा आलेटार, दोभाने लगायत बस्ती छन् । योजनाअनुसार प्रहरी र सशस्त्र टोली पुग्ने बेला स्थानीयहरू घर छाडेर डाँडा माथिमाथि उक्ले र डाँडाको डिलबाट ढुंगा बर्साए ।

फोहोर बोकेका ट्रक तथा टिपरहरूको बाटोमा ढुंगा, मुढा र रूखका हांगाहरू राखिएका छन् । बुधबार दुई सयभन्दा बढी प्रहरी परिचालन गरिएको थियो । यो अघिल्लो दिनको तुलनामा करिब दोब्बर हो । सशस्त्र प्रहरी टोली पनि खटिएको थियो । प्रहरी गाउँमा घुसेपछि स्थानीयले डाँडा माथिबाट ढुंगा हानेका थिए ।

दिनभरिको झडप र तनावपछि फोहोर लिएर गएका ट्रक तथा टिपरहरू डम्पिङ साइटसम्म पुग्न सकेन र फोहोर बोकेरै फर्किए । फोहोरको गाडी फर्किएपछि साँझ सडकै जाम भयो । फोहोर फाल्न गएका कन्टेनरको सुरक्षाको लागि खटिएका प्रहरीमाथि स्थानीयले आक्रमण गरे । स्थानीयले फोहोरका गाडीलाई प्रहरीले सुरक्षा दिएको भन्दै प्रहरीमाथि ढुंगा प्रहार गरेका हुन् ।

बिहीबार पनि स्थानीय अवरोध गर्ने छन् । उनीहरुले माग पुरा नभएसम्म फोहोर फल्न नदिने बताई रहेका छन् । यता, फोहोरकै विषयमा राजनीतिक दलहरुमा बाझाबाझ छ । निकासका विषयमा दलहरुबीच छलफल भएको छैन् । एकले अर्कोलाई देखाउने काम गरिरहेका छन् ।