मुग्लिन निस्कने सबै सडक अवरुद्ध : नारायणगढ, तनहुँ र काठमाडौंतर्फ रोकिएका यात्रु अलपत्र

 २७  जेठ, काठमाडौं ।  पोखरा र नारायणगढ तर्फबाट मुग्लिन निस्कने दुबै तर्फको आवगमन अबरुद्ध भएको छ । तनहुँको आँबुखैरेनी सडक भासिँदा दुईतर्फी सवारी आवगमनमा अवरुद्ध भएको हो भने चितवनको तोपे खोलामा सुक्खा पहिरोले मुग्लिन–नारायणगढ सडक फेरि अबरुद्ध बनाएको छ ।

सडक भासिएको मर्स्याङ्दी नदी किनारमा दुई पुरुष शव फेलापरेको छ । मृतक दुवैको सनाखत हुन नसकेको जिल्ला ट्राफिक कार्यालय तनहुँका प्रहरी नायव निरीक्षक गोकर्ण नेपालले जानकारी दिएका छन् ।

उनले पोखरा र चितवनबाट आएको गोताखोर टोलीले उक्त नदीमा खोजीकार्य भइरहेको र नदीमा मोटरसाइकल र कारको पाटपुर्जा भेटिएकाले मानवीय क्षति बढ्न सक्ने बताएका छन् । गए रातिदेखि परेको अविरल वर्षाका कारण सडकको तलको भाग कटान गर्दा सडक भासिएर जोखिम र राजमार्ग अबरुद्ध बनेको हाे ।

सडकको तलको भाग भासिएकाले बेलिब्रिज नराखेसम्म सवारी आवतजावतमा सम्भव नदेखिएको तनहुँ प्रहरीले जनाएको छ । सडक भासिएका कारण उक्त स्थानमा आबुखैरेनीबाट मुग्लिनतर्फ जादै गरेको कार अन्दाजी २०० मिटर तल मर्स्याङ्दी नदीको खोचमा खसेको जिल्ला ट्राफिक प्रहरी कार्यालय तनहुँले जनाएको छ ।

सडक भासिदा सवारी साधनलाई पोखरा र मुग्लिनमै रोक्न लगाइएको छ । अबरुद्ध सडक तत्काल खुल्न सक्ने अवस्थामा नरहेको घटनास्थलमा खटेको प्रहरीले जानकारी दिएको छ ।

यता, चितवनको नारायणगढ–मुग्लिन सडकखण्डको तोपे खोलामा सुख्खा पहिरो खस्दा नारायणगढ–मुग्लिन सडकखण्ड दुईतर्फी अवरुद्ध भएको छ । बागमती ट्राफिक प्रहरी कार्यालयका प्रमुख सुशीलसिंह राठौरका अनुसार आज बिहान पौने ९ बजेको समयमा इच्छाकामना गाउँपालिका–६ तोपेखोला नजिकै सुख्खा पहिरो खस्दा सडक दुईतर्फी अवरुद्ध भएको हो ।

हिजो पनि पहिरोका कारण सवारी साधन बीचबाटोमै रोकिएका थिए । राभरको प्रयासमा पहिरो पन्छाएर सवारी साधनलाई पालैपालो गन्तव्यमा पुर्याइरहेको बेला फेरि खसेको पहिरोका कारण यात्रुहरुले सास्ती पाएका छन् ।

बागमती ट्राफिक प्रहरी कार्यालयका अनुसार फेरि सुख्खा पहिरो आएर सडक रोकिएको हो । पहिरो पन्छाउने काम जारी छ । तर सडकमा सवारी साधनको लामो लाइन भएकाले सहज हुन समय लाग्ने भएको छ । सडकमा सवारी साधनको लामो लाइन छ । आँबुखैरेनी नजिकै सडक भासिएपछि पोखरा लगायतका ठाउँमा जाने सवारी साधनलाई पनि भरतपुरकै इलाकामा रोक्ने काम भएको छ । जाम भएका सवारी साधनको लाइन चितवनको रामनगरसम्म रहेको बताइएको छ ।

प्रहरीका अनुसार धादिङ प्रहरीसँग पनि समन्वय गरेर काठमाडौं लगायतका ठाउँबाट पोखरा जाने सवारी साधनहरुलाई बाटोको अवस्था हेरेर मात्रै आउन भनिएको छ । अहिले काठमाडौंबाट जाने र उताबाट आउने सबै सवारी रोकिएका छन् ।