शेयरबजारका सबै सूचक ऋणात्कम, कारोबार रकम खुम्चिएर एक अर्बभन्दा तल

३० जेठ, काठमाडौं । शेयरबजार यो साताको सुरुमै आरालो झरेको छ । सोमबार शेयरबजारका सबै सूचक घटेका छन् । नेप्से परिसूचक १५.८२ अंकले घटेर २०३२ अंकमा कायम भएको छ । कारोबार रकम एक अर्बमुनि खुम्चिएको छ । कुल ९९ करोड ८६ लाख रुपैयाँको कारोबार भयो । ४५ कम्पनीको मूल्य बढ्दा १४३ को घट्यो भने ७ को स्थिर रहेको छ ।

साताको पहिलो कारोबार दिन बजारमा दोहोरो अंकले गिरावट आउँदै बजार परिसूचक नेप्से १५.८२ अंकले घटेर २०३२.३४ अंकमा बन्द भएको हो । नेप्सेसँगै सबै उपसूचकमा पनि गिरावट भएको छ । ‘क’ वर्गका कम्पनीलाई मापन गर्ने सेन्सिटिभ इन्डेक्स पनि घटेको छ । सेन्सिटिभ इन्डेक्स २.३० अंकले घटेर ३८९.९५ अंकमा बन्द भएको छ ।

नेप्से घट्दा कारोबार रकम पनि एक अर्ब पुग्ने सकेन । गत शुक्रबार पनि एक अर्बबाट तल झरेको कारोबार रकम आज पनि ९९ करोड ८७ लाखमा सीमित भयो । आज सानिमा बैंकको सर्वाधिक ९ करोड २ लाखको कारोबार भएको छ । उपकार लघुवित्तको पाँच करोड ६४ लाख र सिभिल बैंकको ५ करोड ३७ लाखको कारोबार भएको छ ।

आज कारोबारमा आएकामध्ये बलेफी हाइड्रोपावर र ग्रिन भेन्चर लिमिटेको शेयरमूल्य बढेर सकारात्मक सर्किट लेभलमा बन्द भएको छ । त्यस्तै युनिलिभर नेपालको सेयरमूल्य ४.१० प्रतिशतले बढेको छ । यता मानुषी लघुवित्तको शेयरमूल्य सवार्धिक ४.४० प्रतिशतले गिरावट हुँदा ओरियन्टल होटेलको ५.२० प्रतिशत र बुद्धभूमि नेपाल हाइड्रोपावरको शेयरमूल्य ५.०६ प्रतिशतले गिरावट भएको छ ।