देउवाले मन्त्री नफेर्दा एकीकृत समाजवादीमा लफडा,डाकियो पोलिटब्यूरो बैठक

१० असार, काठमाडौं । पार्टीबाट नाम पठाएको लामो समय भइसक्दा पनि प्रधानमन्त्री शेरबहादुर देउवाले मन्त्रिपरिषद् हेरफेर नगरेका काण समस्यामा परेको सत्तारुढ नेकपा एकीकृत समाजवादीले यसै विषयमा छलफल गर्न पोलिटब्यूरो बैठक बोलाएको छ ।

एकीकृत समाजवादीका प्रचार विभाग प्रमुख जगन्नाथ खतिवडाका अनुसार बैठक तीनकुनेस्थित पार्टी कार्यालयमा सुरु भएको छ । समाजवादीले सरकारमा गएका मन्त्रीहरू फिर्ता बोलाएर नयाँ पठाउने निर्णय गरेपछि गठबन्धनका दल र उसकै पार्टीमा पनि अहिले विवाद छ ।

सिफारिस भएका नयाँ मन्त्रीहरूले शपथको समय कुरिरहँदा प्रधानमन्त्रीले अहिले मन्त्रिपरिषद् हेरफेर गर्ने सुरसार गरेका छैनन् । मन्त्री फेर्ने विषयले एकीकृत समाजवादी पार्टीभित्रको तरंगनै ल्याएको छ । केन्द्रीय कमिटी बैठकको पूर्वसन्ध्यामा पोलिटब्यूरोमा आज यसविषयमा छलफल हुन लागेको हो । समाजवादीले १३ र १४ असारमा केन्द्रीय परिषदको बैठक पनि डाकेको छ ।

समाजवादीका तर्फबाट मन्त्रीमण्डलमा हेरफेर गर्ने निर्णय कार्यान्वयन गर्न प्रधानमन्त्री शेरबहादुर देउवाले अरुचि देखाएका कारण पार्टी समस्यामा परेको हो । बजेट अधिवेशन चलिरहेको बताउँदै तत्काल मन्त्रीमण्डल हेरफेर गर्न प्रधानमन्त्री देउवाले अरुचि देखाएका थिए । तर, संसद अधिवेशन अन्त्य गर्ने तयारी भइरहँदासमेत उनले चासो दिएका छैनन् ।