महोत्तरीमा पत्रकारसम्बद्ध संस्थामा नयाँ नेतृत्व

१९ असार, महोत्तरी । महोत्तरीमा पत्रकारसम्बद्ध संस्थामा नयाँ नेतृत्व स्थापित हुने क्रम छ । नेपाल पत्रकार महासंघ महोत्तरी शाखाको कार्यवाहक अध्यक्षले पदबहाली गरेलगत्तै बर्दिबास नगर पत्रकार सञ्जाल (महोत्तरी)को नेतृत्व पनि फेरिएको हो ।

महासंघ महोत्तरी शाखाका उपाध्यक्ष हेमकुमारी बराल (सुनिता)ले शुक्रबार कार्यवाहक अध्यक्षको पदबहाली गरेका थिए । शनिबार सञ्जालको अध्यक्षको जिम्मेवारी २५ वर्षीय युवा पत्रकार ललनकुमार मण्डलले सम्हलेका छन् ।

उनले महासंघ महोत्तरी शाखाको कार्यसमिति सदस्य पनि भए । महासंघको जिम्मेवारीबाट राजीनामा नगरी अध्यक्ष कमलेश मण्डलले गत स्थानीय तह निर्वाचनमा जिल्लाको मटिहानी नगरपालिकाको प्रमुख पदमा नेकपा (माओवादी केन्द्र)बाट प्रतिस्पर्धा गरेका थिए ।

महासंघ केन्द्रीय समितिले स्थानीय तह चुनावमा उम्मेदवार भएका हुन । मण्डललाई पदमुक्त गरी खुला उपाध्यक्ष बराललाई कार्यवाहक अध्यक्ष तोकेपछि शुक्रबार उनले पदबहाली गरेका छन् ।

त्यसैगरी सञ्जालका अध्यक्ष विक्रमप्रसाद रौनियारले समय दिन नसकेको असमर्थता जनाई दिए राजीनामा शनिबार सम्पन्न सञ्जालको वार्षिक साधारणसभाले स्वीकृत गरी मण्डललाई उक्त जिम्मेवारी दिएको हो ।

उनलाई शनिबार नै निवर्तमान अध्यक्ष रौनियारले पद हस्तान्तरण गरे । महासङ्घ महोत्तरी शाखामा जिल्लाका कार्यरत ४१ र सञ्जालमा बर्दिबास नगर क्षेत्रमा क्रियाशील ११ जना पत्रकार आबद्ध छन् ।

जिल्लामा १० नगरपालिका र पाँच गाउँपालिकासहित १५ स्थानीय तह छन् । यीमध्ये पत्रकार हकहित र पेशागत क्षमता अभिवृद्धि गर्ने उद्देश्यसाथ बर्दिबास र गौशाला नगरपालिकामा सञ्जाल दर्ता भई सञ्चालनमा छन् ।