प्रधानमन्त्री र गभर्नरबीच बालुवाटारमा छलफल, आजै राजीनामा दिने सम्भावना

३० असार, काठमाडौं ।  विवादमा तानिएपछि नेपाल राष्ट्र बैकका गभर्नर महाप्रसाद अधिकारीले पदबाट राजीनामा दिने मनस्थिति बनाएका छन् । प्रधानमन्त्री शेरबहादुर देउवाले पछिल्लो समयमा आएको विवादबारे जानकारी लिन बोलाएपछि बालुवाटार पुगेका गभर्नर अधिकारीले घटनाका विषयमा जानकारी गराएका छन् ।

बालुवाटार स्रोतका अनुसार प्रधानमन्त्रीले डाकेपछि गभर्नर अधिकारी बालुवाटार पुगेका हुन् । उनले तयारी अवस्थामा रहेको मौद्रिक नीतिका विषयमा पनि प्रधानमन्त्रीलाई बिफ्रिङ गरेका छन् । नेकपा एमालेको अर्थ विभागको सदस्यका रुपमा काम गरिरहेको भन्दै अधिकारीको एम अधिकारीका रुपमा चर्चा भएपछि पछिल्लो विवादमा तानिएका हुन् ।

संसदबाट उनलाई राजीनामा दिएर बाहिरिन सुझावसमेत आइसकेको छ । तर बालुवाटारले अधिकारीलाई आर्थिक अवस्थाका विषयमा ब्रिफिङका लागि बोलाएको स्रोतले जनाएको छ । अर्थमन्त्री जनार्दन शर्माले राजीनामा दिएपछि सो मन्त्रालयको जिम्मेवारी पनि प्रधानमन्त्रीसमेत रहेका शेरबहादुर देउवाले लिएका छन् ।

मौद्रिक नीति आउने समयमा राजीनामा गर्दा पर्ने असर र नगर्दा त्यसले सरकारलाई पार्ने असरका विषयमा पनि प्रधानमन्त्री र अधिकारीबीच छलफल भएको छ । प्रधानमन्त्रीले गभर्नर अधिकारीलाई राजीनामा गर्न भनेको स्रोतको दावी छ ।