माओवादी अध्यक्ष दाहाल आज दिनभरी दिल्लीमा व्यस्त, मोदीसँगको भेटवर्ता भोली मात्रै

३१ असार, काठमाडौं । भारत भ्रमणमा रहेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ शनिबार दिनभर भारतीय नेताहरुसँगको भेटघाटमा व्यस्त हुने भएका छन् । भारत भ्रमणका लागि शुक्रबार दिल्ली पुगेका प्रचण्डले दिल्ली पुगे लगत्तै भेटघाट स’रु गरेका थिए ।

भारतीय जनता पार्टीका अध्यक्षको निमन्त्रणमा भारत पुगेका प्रचण्डलाई विमानस्थलमा भाजपा विदेश विभाग प्रमुख विजय चौथाईवाले स्वागत गरेका थिए । उनीसँग होटल ताज मानसिंहमा शिष्टाचार भेट भएको थियो ।

उनले नेपाली राजदूतावासमा नेपाली संघ संस्थाका प्रतिनिधिहरूसंग भेटघाट गरी नेपाली राजदूतद्वारा आयोजित रात्रिभोजमा सहभागीसमेत भएका छन् । यसक्रममा प्रचण्डले विभिन्न भारतीय व्यपारी र पूर्व कूटनीतिज्ञहरुसँग पनि छलफल गरेका छन् ।

आज शनिबार दिनभरी नै प्रचण्ड राजनीतिक भेटवार्तामा व्यस्त हुने कार्यक्रम रहेको छ । भारतका राष्ट्रीय सुरक्षा सल्लाहकार अजीत डोभाल, विदेश मन्त्री डा. एस जयशंकरसँग भेटवार्ता गर्ने कार्यक्रम रहेको छ । विदेश सचिव विनय मोहन क्वात्रासँग पनि उनको भेटवार्ता हुने छ ।

त्यस्तै प्रचण्ड फाउन्डेसन फर पब्लिक अवेरनेस एन्ड पोलिसी नामक संस्थाद्वारा आयोजित नेपाल भारत सम्बन्धी सेमिनारमा प्रमुख वक्ताको रूपमा सहभागी हुनेछन् । भारतका विदेश मन्त्रीले प्रचण्डको सम्मानमा दिने रात्रिभोजमा सरकारका शीर्ष मन्त्रीहरूसँग भेटघाटको कार्यक्रम रहेको जनाइएको छ ।

आइतबार भारतीय प्रधानमन्त्री नरेन्द्र मोदीसँग भेटवार्ता भ्रमणको कार्यक्रम रहेको छ । त्यस्तै आइतबार नै प्रचण्ड भाजपा मुख्यालय भ्रमणमा पुग्ने छन् । त्यसक्रममा उनले भाजपा अध्यक्ष जेपी नड्डासँग भेटघाट गर्न छन् भने भाजपा अध्यक्षद्वारा आयोजित दिवाभोजमा सहभागी हुने छन् ।