देशभरका जग्गाहरूको वर्गीकरण आगामी मंसिर २३ भित्र सक्न परिपत्र

१ भदौ, काठमाडौं । आगामी मंसिर २३ गते भित्र देशभरका सबै स्थानीय तहभित्रका जग्गाहरूको वर्गीकरण गरिसक्न भूमि व्यवस्था, सहकारी तथा गरिबी निवारण मन्त्रालयले परिपत्र गरेको छ ।

मन्त्रालयले आज प्रेस विज्ञप्ति जारी गर्दै आगामी मंसिर २३ गतेसम्ममा कम्तीमा कृषि क्षेत्र र गैर कृषि क्षेत्रमा वर्गीकरण गर्नुपर्ने जनाएको हो ।

सरकारले कृषियोग्य जग्गाको संरक्षण, खण्डीकरण नियन्त्रण, चक्दाबन्दी कार्यक्रममार्फत् कृषि उत्पादन वृद्धि र खाद्य सुरक्षाको प्रत्याभूति, दिगो पूर्वाधार, विकास व्यवस्थित शहरीकरण र सुरक्षित आवासलगायत अन्य विभिन्न उद्देश्य राखेर भूउपयोग नीति जारी गरेको छ ।

त्यस्तै, सरकारले २०७९ भूउपयोग नियमावली जारी गरेर स्थानीय तहलाई भूमिको वर्गीकरण, भूउपयोग योजना तर्जुमा र कार्यान्वयन गर्ने अधिकार तोकिएका छन् । साथै, नियमावलीको अनुसूची १ मा भूउपयोग क्षेत्र निर्धारण गर्ने आधारहरू र मापदण्डको समेत व्यवस्था गरिएको छ ।