बसको ठक्करबाट अटोमा सवार ४ जना मध्ये ३ जनाको मृत्यु

२ भदौ, रौतहट । रौतहटको चन्द्रपुरमा बसले अटो रिक्सालाई ठक्कर दिंदा तीन जनाको मृत्यु भएको छ । चन्द्रपुर नगरपालिका २ पूर्वपश्चिम राजमार्गको लच्कामा वसले अटोलाई ठक्कर दिएको हो ।

काठमाडौंबाट सर्लाही जाँदै गरेको बागमती प्रदेश ०३- ००१ ख २०१ नम्बरको बसले सर्लाहीबाट वीरगञ्जतर्फ आउँदै गरेको प्रदेश अटो रिक्सालाई ठक्कर दिंदा तीन जनाको मृत्यु भएको इलाका प्रहरी कार्यालय चन्द्रपुरले जनाएको छ ।अटोमा सवार रहेका चारमध्ये तीनजनाको अस्पताल ल्याउँदै गर्दा मृत्यु भएको हो ।

दुर्घटनामा परि मृत्यु हुनेमा सर्लाही २ सोल्टीका प्रेम ठाडामगर, ढकबहादुर लुंगेली र अटो चालक रवि मगर रहेको प्रहरीले जनाएको छ ।दुर्घटनामा लुंगेलीकी श्रीमती सविना लुंगेली घाइते भएकी छिन् । उनको चन्द्रपुर अस्पतालमा उपचार भइरहेको प्रहरीले जनाएको छ ।