कांग्रेस नेता तथा समाजवादी चिन्तक प्रदीप गिरिको अन्त्येष्टि आजै गरिने

५ भदौ, काठमाडौं । नेपाली कांग्रेसका नेता एवम् समाजवादी चिन्तक प्रदीप गिरिको अन्त्येष्टि आजै गरिने भएको छ । घाँटीको क्यान्सरबाट ग्रसित प्रतिनिधिसभा सदस्य ७५ वर्षीय गिरिको शनिबार राति ललितपुरस्थित नेपाल मेडिसिटी अस्पतालमा उपचारको क्रममा निधन भएको हो ।

नेपाली कांग्रेसका मुख्य सचिव कृष्णप्रसाद पौडेलका अनुसार गिरिको पार्थिव शरीरलाई अन्त्येष्टिका लागि दुई बजेपछि पशुपति आर्यघाट लगिनेछ । नेपाली कांग्रेसले शनिबार राति नै शोक वक्तव्य जारी गरी गिरिको पार्थिव शरीरलाई श्रद्धाञ्जलीका लागि सानेपास्थित पार्टी कार्यालयमा राखिने जनाएको छ ।

त्यसअघि बिहान नौ बजेदेखि ११ बजेसम्म नेपाल मेडिसिटी अस्पतालको प्राङगणमा रहेको शिवालय मन्दिर अगाडि उहाँलाई श्रद्धाञ्जली दिने कार्यक्रम तय भएको छ ।

११ बजेर ३० मिनेटपछि उनको पार्थिव शरीरलाई नेपाली कांग्रेस केन्द्रीय कार्यालय, वीपी स्मृति भवन, सानेपामा राखिनेछ । दुई बजेपछि उनको पार्थिक शरीरलाई पशुपति आर्यघाट लगिनेछ । जहाँ अन्तिम श्रद्धाञ्जली दिइनेछ ।