आयोगद्वारा अर्थ मन्त्रालयसँग दश अर्ब ९८ करोड बजेट माग

६ भदाै, काठमाडौं । निर्वाचन आयोगले अर्थ मन्त्रालय समक्ष आगामी चुनावका लागि दश अर्ब ९८ करोड बजेट माग गरेको छ । स्थानीय चुनावको भन्दा प्रतिनिधि सभा तथा प्रदेश सभा सदस्य निर्वाचनका लागि दोब्बर बजेट माग गरिएको हो ।
आयोगका प्रवक्ता शालिग्राम शर्मा पौडेलले आइतबार अर्थ मन्त्रालयलाई पत्राचार गरी बजेट माग गरिएको जानकारी दिएका छन् । आयोगले माग गरेको बजेटको सबैभन्दा ठूलो भाग निर्वाचन अधिकृतको कार्यालय व्यवस्थापन, मतदान केन्द्रका जनशक्ति लगायत मतगणनामा खर्च गरिनेछ ।

उनले जनशक्ति र कार्यालय व्यवस्थापनमा करिब छ अर्ब दुई करोड खर्च हुने अनुमान गरिएको जानकारी दिए । उक्त बजेट निर्वाचनको कुल खर्च करिब ६० प्रतिशत हो । आयोगले आगामी चुनावमा करिब दुई लाख जनशक्ति आवश्यक पर्ने जनाएको छ ।

त्यसैगरी, सामग्री व्यवस्थापनमा करिब दुई अर्ब तीन करोड खर्च हुनेछ । मतपत्र छपाइ, मतपेटिका खरिद, छेकावारालगायतका ५७ प्रकारका निर्वाचन सामग्री उक्त बजेटबाटै खर्चिनेछ ।

आयोगले अर्थ मन्त्रालयसँग माग गरेको बजेटमा अनुगमन तथा वैदेशिक सम्बन्ध सम्बन्धी शिर्षकका लागि ११ करोड छुट्याइएको छ । मतदाता शिक्षा तथा तालिमका लागि ६९ करोड रुपियाँ खर्च हुने आयोगले अनुमान गरेको छ । यसअघि स्थानीय निर्वाचनमा उक्त शिर्षकमा मात्र २४ करोड छुट्याइएको थियो । जसमध्ये करिब १६ करोड मात्रै खर्च भएको थियो ।

प्रवक्ता पौडेलले आयोगको केन्द्रीय कार्यालय तथा जिल्ला र प्रदेशस्थित कार्यालयको प्रशासनीक खर्च अन्र्तगत ८९ करोड खर्च हुने अनुमान गरिएको बताउनुभयो । निर्वाचन समीक्षा र प्रतिवेदन शिर्षकमा दुई करोड खर्च लाग्ने आयोगले जनाएको छ । मतदाता नामावली तथा निर्वाचन सञ्चालन खर्च अन्र्तगत करिब ५५ करोड खर्च हुने आयोगले जनाएको छ ।