सत्ता गठबन्धनभित्र सिट वितरणमा सकस, सिटौला संक्रमित भएपछि अनिश्चित बैठक आज बस्दै

९ भदौ, काठमाडौं । आगामी प्रदेश र प्रतिनिधि सभा निर्वाचनको सिट बाँडफाँटको लागि सत्तारुढ गठबन्धनले गठन गरेको कार्यदलको बैठक आज प्रधानमन्त्री निवास बालुवाटारमा बस्दै छ ।

बैठक विहान ९ बजेबाट सुरु हुने कार्यदलका सदस्य मिहलाल पूरीले जानकारी दिएका छन् । कार्यदलका संयोजक तथा नेपाली कांग्रेसका नेता कृष्ण प्रसाद सिटौला भने बैठकमा अनुपस्थित रहनेछन् ।

कोरोना भाइरसको संक्रमण भएका कारण उनी बैठकमा अनुपस्थित हुने भएका हुन् । कार्यदलको बैठक बालुवाटारमा पटक पटक बस्दै आएपनि सत्तारुढ दलहरुबीच सिट बाँडफाँटमा कुरा मिल्न सकेको छैन ।

आगामी संघ र प्रदेशको निर्वाचनको लागि सिट वितरण निकै सकसको अवस्थामा छ। पटक पटक बस्दै निष्कर्षबिहीन बनेको सत्ता गठबन्धनको कार्यदल बैठकले सिट बाँडफाँटका आधार र मापदण्ड जटिल बन्दै गएको छ । यसले राष्ट्रिय राजनीतिमा लागेकाहरुको भविष्य पनि निर्धारण गर्ने भएकाले सिट बाँडफाँट असहज बनेको देखिएको छ।

११ सदस्यीय कार्यदलको संयोजक नेपाली कांग्रेसका पूर्वमहामन्त्री कृष्णप्रसाद सिटौला छन् । कार्यदलमा नेपाली कांग्रेसबाट सिटौला, महामन्त्री गगनकुमार थापा र ज्ञानेन्द्रबहादुर कार्की छन् ।

माओवादी केन्द्रबाट वर्षमान पुन र देव गुरूङ, नेकपा एकीकृत समाजवादीबाट उपाध्यक्ष प्रमेश हमाल र महासचिव बेदुराम भुसाल, जनता समाजवादी पार्टीबाट रामसहाय यादव र रकम चेम्जोङ तथा राष्ट्रिय जनमोर्चाबाट हिमलाल पुरी र आनन्द शर्मा सदस्य छन् ।

कार्यदललाई कुन दलले कति सिट लिने भनेर साउन अन्तिम सातासम्म सिफारिस गर्न भनिएको थियो । कार्यदलको पहिलो बैठक साउन २३ गते बसेको थियो। त्यस्तै साउन २६ गते बसेको बैठकले शीर्ष नेतालाई प्राथमिकतामा राखेर सिट बाँडफाँट गर्ने रणनीतिसहित आ–आफ्ना दलमा छलफल गरेर टुंगो लगाउने निर्णय गरेको थियो। त्यसयता कार्यदलमा निरन्तरजसो औपचारिक, अनौपचारिक छलफल हुँदै आएको छ।

कार्यदलमा संघ र प्रदेशको निर्वाचनमा ठूला नेताहरुको सिट सुरक्षित गर्ने रणनीतिसहित छलफल अगाडि बढाइएको छ, तर एउटै क्षेत्रमा दुई वा दुई भन्दा बढी बलिया दाबेदार हुँदा तालमेलमा नेताको व्यवस्थापन भने सहज देखिएको छैन। सत्ता गठबन्धनमा आबद्ध दलका शीर्ष नेताहरुका निर्वाचन क्षेत्र एउटै पर्दा कार्यदलको बैठक सकारात्मक र नतिजा उन्मुख हुन सकेको छैन।