प्रतिनिधिसभा निर्वाचनको मतपत्रमा ७९ वटा चुनाव चिह्न रहने

९ भदौ, काठमाडौं । आगामी प्रतिनिधिसभा तथा प्रदेशसभा सदस्य निर्वाचनमा भाग लिन निवेदन दिएका सबै ८७ वटै दलको दर्ता स्वीकृत भएको छ । निर्वाचन आयोग पदाधिकारीको बुधबार बसेको बैठकले दलहरुको दर्ता स्वीकृत गर्ने निर्णय गरेको हो ।

आयोगका अनुसार दर्ता स्वीकृत भएपछि आगामी प्रतिनिधिसभा सदस्य निर्वाचनको मतपत्रमा ७९ वटा चुनाव चिह्न रहनेछन् । दर्ता लागि निवेदन दिएकोमध्ये ७५ दलको आफ्नै चुनाव चिह्न रहनेछन् । तर निवेदन दिदा चार वटा समूहमा रहेका १२ वटा दलले तालमेल गर्ने निर्णय गरेर एकल चुनाव चिह्न माग गरेका थिए । आयोगले उक्त १२ दलको चार वटा चुनाव चिह्न कायम गरी दर्ता स्वीकृत गरेको हो । जस बमोजिम प्रतिनिधि सभातर्फ ७९ वटा चुनाव चिह्न कायम भएको हो ।

नेकपा(माओवादी केन्द्र) र नेपाल समाजवादी पार्टीको एकल चुनाव चिह्न स्वीकृत भएको हो । बाबुराम भट्टराई नेतृत्वको नेपाल समाजवादी पार्टीले माओवादी केन्द्रको गोलाकारभित्र हसिया हथौडा चुनाव चिह्नबाटै स्पर्धा गर्ने सुनिश्चित भएको हो । नेपाल कम्युनिष्ट पार्टी(राष्ट्रवादी), समाजवादी केन्द्र नेपाल, आधुनिक नेपाल समाजवादी पार्टीको समेत एकल चुनाव चिह्न कायम गरिएको छ । सामाजिक एकता पार्टी, नेकपा(समाजवादी) र नेपाल दलित पार्टीले समेत तालमेल गर्ने निर्णय गर्दै एकल चुनाव चिह्न माग गरेकोमा आयोगले उक्त निवेदन स्वीकृत गरेको हो ।

नेपाल आमा पार्टी, नेपाल नौलो जनवादी पार्टी, सचेत नेपाल पार्टी र नेपाल सुशासन पार्टीले तालमेल गरी नेपाल आमा पार्टीको चुनाव चिह्न कायम गरिदिन माग गरेको थियो । आयोगले उक्त दलहरुको बच्चा काखमा लिएकी आमा चुनाव चिह्न स्वीकृत गरेको हो । आयोगले मङ्सिर ४ गते हुने आम चुनावमा सहभागी हुन साउन २२ गतेदेखि ३१ गतेसम्म दर्ताका लागि राजनीतिक दलसँग निवेदन आह्वान गरेको थियो ।

आयोगको निर्वाचन कार्यतालिका बमोजिम दल दर्ता स्वीकृत भएपछि समानुपातिकतर्फ भाग लिन चाहने दलको दर्ता प्रकृया शुक्रबारदेखि सुरु हुँदैछ । दर्ता भएका दलले समानुपातिकतर्फको बन्द सूची असोज पहिलो साता बुझाउनुपर्नेछ । असोज २३ गते प्रतिनिधि सभा र प्रदेश सभा सदस्यको पहिलो हुने निर्वाचित हुने(प्रत्यक्ष)तर्फको उम्मेदवारी दर्ता हुनेछ ।

मधेश प्रदेशमा सबैभन्दा बढी दल भाग लिने

निर्वाचन आयोगमा दर्ताका लागि निवेदन दिएकोमा प्रदेश सभातर्फ सबैभन्दा बढी मधेश प्रदेशमा ६७ दलले स्पर्धा गर्ने भएका छन् । दर्ता स्वीकृत भएको आधारमा वागमतीमा ६४ दल र प्रदेश नं १ मा ६० दल प्रदेश सभा चुनावमा भाग लिनेछन् । लुम्बिनिमा ६०, गण्डकीमा ५८, कर्णाली र सुदूरपश्चिममा समान ५६ दल भाग लिनेछन् ।