कर्णालीमा दुई मन्त्रीले दिए राजीनामा, भाेली नयाँ मन्त्रीहरु नियुक्त हुने

♦ हेमन्त केसी

सुर्खेत , १२ भदौ । कर्णाली प्रदेशका दुई जना मन्त्रीले राजीनामा दिएका छन् । जलस्रोत तथा ऊर्जा विकास मन्त्री गणेशप्रसाद सिंह र आर्थिक मामिला तथा योजना मन्त्री विन्धमान विष्टले मुख्यमन्त्री जीवनबहादुर शाहीसमक्ष राजीनामा बुझाएका छन् ।

नेकपा ‘माओवादी केन्द्र’संसदीय दलले उनीहरुलाई राजीनामा दिन आग्रह गरेसँगै आइतबार मन्त्रीद्वयले राजीनानामा बुझाएका हुन् । राजीनामा पत्र बुझेलगत्तै मुख्त्री शाहीले स्वीकृत समेत गरिसकेका छन् ।

माओवादी संसदीय दलको बैठकले सरकारमा सहभागी विष्ट र सिंहलाई फिर्ता बोलाएर रुकुम पश्चिमका रातो कामी र जाजरकोटकी कृष्णा शाह आचार्यलाई मन्त्री बनाउने निर्णय गरेको थियो। ‘पार्टीको निर्णय अनुसार राजीनामा दिएका हौं,’ विष्टले भने, ‘नयाँ साथीहरुले सरकार सञ्चालन गर्नुहुन्छ, हामीले पार्टी सञ्चालनमा ध्यान दिन्छौं।’

कर्णाली प्रदेश सभामा माओवादी केन्द्रका ११ सांसद छन्। उपसभामुख रहेकी पुष्ण घर्तीमगरबाहेक कामी र आचार्यले शपथ खाएपछि सबैजना मन्त्री बन्नेछन्। यो अवधिमा माओवादीले छ महिनाका लागि गैरसांसद हुम्लाका कार्चेन लामालाई पनि मन्त्री बनाइसकेको छ।

विष्ट २०७८ मंसिर १४ गते मन्त्री नियुक्त भएका थिए भने सिंह माघ २३ गते मन्त्री नियुक्त भएका थिए। माओवादीले नयाँ मन्त्रीको नाम सिफारिस गरिसकेको छ। सोमबार नयाँ मन्त्रीहरु नियुक्त हुने र भाेली नै पद तथा गोपनीयताको शपथ खुवाइने बताइएकाे छ ।