आर्थिक चलखेलको आरोपमा जिल्ला न्यायाधीश अधिकारी बर्खास्त

१५ भदौ, काठमाडौं । आर्थिक लेनदेनबाट न्याय सम्पादन गरेको अभियोग लागेका जिल्ला न्यायाधीश श्यामशुन्दर अधिकारी बर्खास्तीमा परेका छन् । बुधबार बसेको न्यायपरिषदको बैठकले जिल्ला न्यायाधीश अधिकारीलाई बर्खास्त गरेको छ ।

न्यायपरिषद् बैठकले न्यायाधीश अधिकारीलाई बर्खास्त गर्ने निर्णय गरेको परिषदका प्रवक्ता मानबहादुर कार्कीले जानकारी दिएका छन् । अधिकारी जिल्ला अदालत बाँकेको न्यायाधीश हुँदा आर्थिक स्वार्थ र लेनदेन विवादमा परेका थिए । उनीबिरुद्ध आर्थिक चलखेल गरी न्याय सम्पादन प्रभावित पारेको उजुरी परेको थियो ।

उजुरीपछि उनलाई न्याय परिषदले सर्वोच्च अदालतमा झिकाएको थियो । बाँकेकी अधिकारकर्मी रुवी खानलाई पक्राउ गर्दा उनीमाथि ‘यान्त्रिक रुपमा पक्राउ अनुमती दिएको’ आरोप लागेको थियो । अधिकारीमाथि सप्तरी जिल्ला अदालतमा हुँदा घुस खाएको आरोप पनि लागेको छ ।

उनको खातामा शंकास्पद रुपमा ८ लाख रुपैयाँ भेटिएको थियो । त्यतिबेलै न्यायाधीश सपना प्रधान मल्लको इजलासले बर्खास्तीको सिफारिस गरेको थियो । तर कार्यान्वयन भएको थिएन । आरोपपछि पनि अधिकारी कालीकोट र बाँकेमा जिल्लामा सरुवा भएका थिए ।