३९ विधामा दोश्रो क्वालिटी इन्टरटेनमेन्ट अवार्डको मनोनयन सार्वजनिक

२३ भदौ, काठमाडौं । कोरोनाको महामारी पछि सुस्ताएको नेपाली गीत संगीत तथा चलचित्र उद्योगलाई माथि उठाउन दुई वर्ष अघिबाट क्वालिटी इन्टरटेनमेन्ट अवार्डको आयोजना सुरु गरिएको हो । यसै क्रममा ‘दोश्रो क्वालिटी इन्टरटेनमेन्ट अवार्ड २०७९’ को उत्कृष्ट पाँचको मनोनयन सार्वजनिक गरिएको छ ।

२०७८ बैशाखदेखि २०७९ भदौको पहिलो सातासम्म रिलिज भएका गीतहरुबाट उत्कृष्ट पाँचको मनोनयन निर्णयक समितिले छनौट गरेको आयोजक संस्था क्वालिटी फिल्मस् प्रालिका अध्यक्ष उमेश गुरुङले जानकारी गराएका छन् ।

चलचित्र, गीत, संगीत, म्युजिक भिडियो, फेशन तथा मोडलिङका विभिन्न विधामा यो अवार्ड प्रदान गरिने यो अवार्डको लागि यतीबेला गीत संगीत अन्तर्गत लोक, आधुनिक, पप, लोक दोहोरी, पर्व गीत, भेग विशेष गीत, राष्ट्रिय भावको गीत, भाषाभाषी गीतको गायक गायिका, संगीतकार, गीतकार, संगीत संयोजक, ध्वानी मिश्रण, बाद्यबादन तथा म्युजिक भिडियो अन्तर्गत मोडल, छायाँकार, निर्देशक जस्ता विधामा मनोनयन सार्वजनिक गरिएको पनि क्वालिटी इन्टरटेनमेन्ट प्रा।लि।का अध्यक्ष उमेश गुरुङले बताएका छन् ।

आगामी असोजको पहिलो साता काठमाडौंमा भव्य समारोहबीच यो अवार्ड आयोजना गरिने भएको छ । अवार्डको मनोनयनमा परेकाहरुलाई यही २८ भदौ आईतबार काठमाडौंका नया बानेश्वर स्थित अर्याल होटलमा प्रमाणपत्र प्रदान गरिने भएको छ ।