सीट बाँडफाँड मिलाउन सत्ता गठबन्धनको बैठक बालुवाटारमा, समूह समूहमा छलफल

२७ भदौ, काठमाडौं । सत्तारुढ गठबन्धन दलका नेताहरु सीट बाँडफाँडमा सहमति जुटाउन बालुवाटारमा भेला भएका छन् । प्रतिनिधिसभा र प्रदेशसभाको निर्वाचनमा गठबन्धन बनाएर जाने कसरत गरिरहेका पाँच दलका नेताहरू दुई पक्षीय र त्रिपक्षीय बैठकमा जुटेका छन् ।

एउटै निर्वाचन क्षेत्रमा दाबी गर्ने दुई–तीन दलका नेताहरूबीच प्रधानमन्त्री निवास बालुवाटारमा छलफल भइरहेको सञ्चार तथा सूचना प्रविधिमन्त्री तथा कांग्रेस नेता ज्ञानेन्द्रबहादुर कार्कीले जानकारी दिएका छन् । सत्तारुढ गठबन्धनका नेताहरू सीट बाँडफाँटमा सहमति नजिक पुगेको कार्कीको भनाइ छ । निर्णयको नजिकमा सहमतिपूर्ण तरिकाले गएकाले सबै दल लचिलो हुनुको विकल्प नरहेको उनले बताए ।

दलका नेताहरूबीच कुन क्षेत्र कसले लिने भन्नेबारे छलफल भइरहेकाले तत्काल निष्कर्ष निस्कने संभावना नरहेको कार्कीले संकेत गरे । ’दुई पक्षीय र त्रिपक्षीय छलफल चलिरहेको छ । अझै छलफल बाँकी रहन्छ,’ उनले भने । एउटै निर्वाचन क्षेत्रमा दाबी गर्ने दलहरूबीच छलफल भइरहेको कार्कीले जानकारी दिए । उनले भने, ’एउटै सीटमा दुई, तीन दलले दाबी गरेका छन् । त्यो सबै मिलाएर एकजना मात्रै गठबन्धनको उम्मेदवार बनाउनका लागि दुईपक्षीय र त्रिपक्षीय छलफल भइरहेको छ ।’