प्रमुख दलमा उम्मेदवार टुंगो लगाउन सकस, माओवादीको बैठक सर्यो

३ असोज, काठमाडौं। आगामी प्रतिनिधि सभा तथा प्रदेशसभा सदस्य निर्वाचनका लागि समानुपातिकतर्फ उम्मेदवारको बन्द सूची बुझाउने समय बितिरहँदा प्रमुख दलले अझै उम्मेदवारको टुंगो लगाउन सकेको छैन् । सत्ता गठबन्धनमा रहेका पाँच दल अझै छलफलमै केन्द्रित छन् ।

लोकतान्त्रिक समाजवादी पार्टीले समेत सूची तयार गरिसकेको छैन् । नेकपा(एमाले)ले भने आइतबार नै सूची तयार गरिसकेको छ । उसले आज मध्याह्नपछि निर्वाचन आयोग पुगेर समानुपातिकतर्फको बन्द सूची पेस गर्ने बताइएको छ ।

निर्वाचन आयोगले बन्दसूची पेस गर्न असोज २ र ३ गते गरी दुई दिनको समयसीमा तोकेको छ । असोज २ गते राष्ट्रिय समावेशी पार्टी र तराई मधेश लोकतान्त्रिक पार्टी गरी मात्र दुई दलले प्रतिनिधिसभाका लागि उम्मेदवारको सूची बुझाएका छन् । समानुपातिकतर्फ भाग लिन भने ७६ दलले ६८ वटा निवेदन बुझाएका छन् ।

नेकपा माओवादी केन्द्रको पदाधिकारी बैठक दिउँसो २ बजेका लागि सरेको छ । समानुपातिक सूची तयार गर्न सोमबार बिहान ९ बजे पार्टी केन्द्रीय कार्यालय पेरिसडाँडामा बस्ने भनिएको बैठक दिउँसो २ बजेका लागि सरेको हो ।

समानुपातिक सूची तयारीका लागि गृहकार्य नपुगेकाले दिउँसो २ बजेका लागि बैठक सारिएको एक नेताले बताए । समानुपातिक सूची तयार गर्न महासचिव देव गुरुङको संयोजकत्वमा चार सदस्यीय कार्यदल बनाएको छ । जसको सदस्यमा शक्तिबहादुर बस्नेत, मातृकाप्रसाद यादव र गिरिराजमणि पोखरेल छन् ।

कार्यदलले समानुपातिक सूचीका विषयमा पर्याप्त गृहकार्य गरेपछि पार्टी पदाधिकारी बैठकमा छलफल भई निर्णय हुने बताइएको छ । निर्वाचन आयोगले प्रतिनिधि सभा र प्रदेश सभा सदस्य तर्फको समानुपातिक सूची बुझाउन आज अन्तिम दिन दिएको छ ।