बढ्दै गरेको आत्महत्या रोकथाममा बारा प्रहरीको पृथक प्रयास

३ असोज, बिरगञ्ज । आत्महत्याका घटना रोकथामका लागि सामाजिक स्तरमै सचेतना फैलाउनु पर्नेमा सरोकारवालाहरुले जोड दिएका छन् । जिल्ला प्रहरी कार्यालय बाराले अन्तर्राष्ट्रिय आत्महत्या विरुद्धको दिवसका अवसर पारेर आयोजना गरेको कार्यक्रमकाबीच सरोकारवालाहरुले यस्तो जोड दिएका हुन् ।

बढ्दो महत्वकांक्षा र जीवनशैलीमा तालमेल नहुँदा आत्महत्याका घटना बढिरहेको भन्दै अमूल्य जीवन खेर फाल्न नहुने बारेमा सामाजिक रुपमा नै सचेतना फैलाउन आवश्यक रहेको वक्ताहरुले बताए ।

कार्यक्रममा बाराका प्रमुख जिल्ला अधिकारी कृष्णबहादुर कटवालले अमूल्य जीवनलाई खेर फाल्न नहुने भन्दै आत्महत्या रोकथामका लागि सबैले हातेमालो गरेर सचेतना फैलाउनु पर्नेमा जोड दिए । बढ्दै गरेको आत्महत्याका घटनालाई निर्मूल पार्न सचेतनाको विकल्प नभएकाले सामाजिक स्तरमै सचेतना फैलाउन सबै हातेमालो गर्दै अघि बढ्नु पर्ने उनको भनाई थियो ।

झुण्डिएर आत्महत्या गर्न लागेको जस्तै देखिने गरी तयार पारिएको सांकेतिक पुत्ला बोकेर जिल्ला प्रहरी कार्यालय बाराबाट सुरु भएको र्याली कलैया बजार परिक्रमा गरेर भरत चोकमा पुगेर कोणसभामा परिणत भएको थियो ।

कार्यक्रममा जिल्ला प्रहरी कार्यालय बाराका प्रमुख प्रहरी उपरीक्षक होबिन्द्र बोगटीले आत्महत्याका ८० प्रतिशत घटना डिप्रेसनका कारण हुने गरेको भन्दै तनाब ब्यवस्थापन गर्न सकिए घटना न्यूनिकरण गर्न सकिने बताए । आत्महत्या रोकथामका लागि सबैलाई सचेत बनाउन पृथक तरिकाले सांकेतिक पुत्ला तयार पारेर कार्यक्रम गरिएको प्रहरी उपरीक्षक बोगटीले बताए ।

जिल्ला प्रहरी कार्यालय बाराको आयोजनामा भएको कार्यक्रममा यहाँका सबै सामुदायिक प्रहरी सेवा केन्द्र, आत्महत्या सम्बन्धी क्षेत्रमा काम गर्ने संघ संस्था ससस्त्र प्रहरी, नेपाली सेना, विभिन्न राजनीतिक दलका प्रतिनिधि, चिकित्सक, सञ्चारकर्मी लगायतको सहभागिता रहेको थियो ।

नागरिक स्तरमा सचेतना फैलाउन पृथक ढंगले गरिएको कार्यक्रमले आत्महत्या रोकथाम गर्न मद्धत पुग्ने भन्दै कलैयाबासि एवं नागरिक समाजले प्रशंसा गरेका छन् ।