यूक्रेनको चार प्रमुख शहरमा जनमत संग्रह

५ असोज, काठमाडौं । रुसले यूक्रेनका केही प्रमुख शहरमा जनमत संग्रह गर्न लागेको छ । रुसमा गाभिने कि नगाभिने भन्ने विषयमा युक्रेनका केही प्रमुख शहरहरुमा जनमतसंग्रह हुने रुसले जनाएको छ । यूरोपेली संघले भने रुसको उक्त कदमको आलोचना गरेको छ ।

अन्तर्राष्ट्रिय सञ्चारमाध्यमहरुका अनुसार रुसले कब्जामा लिएको युक्रेनका लुहान्स्क, दोनेत्स्क, खेरसान र जेपोरजियामा जनमत संग्रह हुन लागेको हो । सेप्टेम्बर २३ देखि २७ सम्म जनमत संग्रह हुने बीबीसीले जनाएको छ । लुहान्स्कमा आउँदो शुक्रबार जनमत संग्रहको तयारी भइरहेको रुसी अधिकारीहरुले बताएका छन् । युक्रेनी नागरिकहरुले रुसमा गाभिने कि नगाभिने भनेर आफ्नो मत व्यक्त गर्नेछन् । ती क्षेत्रहरु कब्जामा लिनुअघि रुसी राष्ट्रपति भ्लादिमिर पुटिनले स्वतन्त्र भएको घोषणा गरेका थिए ।