ओलीलाई कालो झण्डा देखाउने जसपाका १२ कार्यकर्ता पक्राउ

८ असोज, जनकपुरधाम । एमाले अध्यक्ष केपी शर्मा ओलीलाई कालो झण्डा देखाउने जनता समाजवादी पार्टी (जसपा) का १२ जना कार्यकर्तालाई पक्राउ गरिएको छ । शनिबार उनलाई जनकपुर विमानस्थलबाट निस्कने बित्तिकै कालो झण्डा देखाइएको थियो । प्रहरीले पक्राउ परेकाहरुलाई जिल्ला प्रहरी कार्यालय धनुषामा राखिएको जनाएको छ ।

लोकतान्त्रिक समाजवादी पार्टी नेपालका कार्यकारिणी सदस्य उमाशंकर अरगरियालगायतका नेतालाई पार्टीमा प्रवेश गराउन ओली जनकपुर पुगेका छन् । यसअघि उनी नेपाली काँग्रेसका युवा नेता सन्तोष यादवलगायतका नेतालाई पार्टीमा प्रवेश गराउन भदौ २७ गते जनकपुर पुगेका थिए ।

एमाले प्रवेश गर्न लागेका उमाशंकर अरगरिया २०७४ को चुनावमा धनुषा २ बाट प्रतिनिधि सभा सदस्य निर्वाचित भएका थिए ।