आम निर्वाचनमा एमाले र जसपाले तालमेल गर्ने सहमति, प्रतिनिधि सभाका १७ सिट यादवलाई

२२ असोज, काठमाडौं । नेकपा एमाले र जनता समाजवादी पार्टी ‘जसपा’बीच आसन्न प्रतिनिधिसभा एवं प्रदेशसभा निर्वाचनमा तालमेल गर्ने सहमति भएको छ। एमाले अध्यक्ष केपी ओली र जसपा अध्यक्ष उपेन्द्र यादवबीच शुक्रबार भएको हस्ताक्षरमा प्रदेश १ मा दुई सिट, मधेस प्रदेशको १४ सिट र लुम्बिनी प्रदेशमा एक सिटमा तालमेल गर्ने सहमति भएको हो। बाँकी ठाउँमा मित्रवत प्रतिस्पर्धा हुने भएको छ।

जसपाले मोरङ क्षेत्र ५, सुनसरी क्षेत्र १, मधेस प्रदेशअन्तर्गत सप्तरीको १, २ र ४, सिरहाको २ र ४, धनुषाको १, महोत्तरीको ३ र ४, सर्लाहीको १ र ४, रौतहटको २, बाराको २, पर्साको १ र २ र रुपन्देहीको ४ मा चुनावी तालमेल गर्ने भएको हो।

त्यस्तै प्रदेशसभातर्फ प्रदेश १ मा ४ सिट, मधेस प्रदेशमा ३२ सिट, लुम्बिनीमा ५ सिट र सूदुरपश्चिम प्रदेशमा १ सिटमा तालमेल गर्ने सहमति भएको हो।