हङकङका प्रजातन्त्र समर्थकमाथि कुटपिट घटनाको छानबिन गर्न माग

३१ असोज, काठमाडौं । हङकङका प्रजातन्त्र समर्थक प्रदर्शनकारीलाई म्यानचेस्टरमा रहेको चिनियाँ वाणिज्य दूतावास नजिक कुटपिट गरेपछि बेलायती कार्यकर्ता र सांसदहरूले छानबिनको माग गरिरहेका छन् ।

हङकङ आदिवासी रक्षा बल नामक प्रजातन्त्र समर्थक समूहले आइतबार बेइजिङमा भएको चिनियाँ कम्युनिष्ट पार्टीको महाअधिवेशनको विरोधमा उत्तरी सहरमा रहेको वाणिज्य दूतावासबाहिर विरोध प्रदर्शन गरेको थियो ।

सामाजिक सञ्जालमा व्यापक रूपमा सेयर गरिएको घटनाको भिडियोमा वाणिज्य दूतावासबाहिर फुटपाथमा प्रदशर्नकारीहरुमाथि दमन भएको र ठूलो स्वरमा चिच्याहट चलेको सुनिन्छ ।

भिडियोमा हङकङका एक प्रदर्शनकारीलाई वाणिज्य दूतावासको गेटबाट तानेर पुरुषहरूको समूहले कुटपिट गरेको समेत देख्न सकिन्छ ।