सर्लाहीमा एक युवकमाथि गोली प्रहार, घाइतेको अवस्था गम्भीर

२ कात्तिक, वीरगञ्ज । सर्लाहीको बागमती नगरपालिकाको मिलनचोकमा एक जना युवकमाथि गोली प्रहार भएको छ । अन्दाजी ३० वर्षीय साजन कार्कीमाथि बुधबार बिहान गोली प्रहार भएको हो ।

उनको दाहिने पाखुरा, कोखामा र तिघ्रामा गोली लागेको छ । घाइतेलाई स्थानीय स्तरमा प्राथमिक उपचारपछि थप उपचार गर्न काठमाडौं पठाइएको छ । घाइते कार्की सहकारी संस्थामा कार्यरत कर्मचारी भएको बुझिएको छ ।

निलो रंगको मोटरसाइकलमा आएका तीन जना अपरिचित व्यक्तिहरुले गोली हानेर फरार भएका थिए । उनीहरुको खोजी भइरहेको प्रहरीले जनाएको छ ।