निर्वाचनपछि संघ र प्रदेशमा गठबन्धनको सरकार बन्ने गृहमन्त्री खाणको दाबी

४ कात्तिक, भैरहावा । गृहमन्त्री एवं नेपाली कांग्रेसका नेता बालकृष्ण खाँणले मंसिर ४ को निर्वाचनपछि संघीय सरकार र प्रदेश सरकार गठबन्धनकै बन्ने दाबी गरेका छन् ।

स्थानीय सरकार, प्रदेश सरकार र राष्ट्रिय सरकारमा सहमति गरेर देशमा शान्ती बहाल एवं जनताको जीवनस्तर सहज तुल्याउनका लागि नै गठबन्धन आवश्यक भएको बताए ।

पाँच दलीय गठबन्धनमा कांग्रेसका तर्फबाट रुपन्देही निर्वाचन क्षेत्र नं ३ बाट प्रतिनिधिसभा सदस्यका लागि उम्मेदवारसमेत रहेका खाँणले सिद्धार्थनगर नगरपालिका–६ को सम्पर्क कार्यालय उद्घाटन कार्यक्रममा सो दाबी गरेका हुन् ।

‘देशको शान्ती, स्थायित्व, स्थिरता र विकास नै अहिले देशको मूल मुद्दा हो । संघीय लोकतान्त्रिक गणतन्त्रको स्थापनापछि गणतन्त्रको प्रतिफल नेपाली जनताले प्राप्त गर्नुपर्यो, यी सबैको प्राप्ति नै पाँच दलीय गठबन्धनको मूल योजना हो’ उनले भने ।

नेपालमा शान्ति, राजनैतिक स्थायित्वको लागि विभिन्न राजनैतिक विचारधारा बोकेका दलको बिचमा सहमति र सहकार्य भएर नै गठबन्धन बनाइएको उनले बताए । ‘जुन पार्टीले सरकार बनाउँछ, उसैले नै विकासको निति निर्माण गर्दछ’ उनले भने, ‘यस क्षेत्रको विकासको लागि जिल्लाको विकासको लागि पाँच दलीय गठबन्धनलाई सहयोग पु¥याउन अपिल गर्दछु ।’
उनले पाँच दलीय गठबन्धनमा लोकतान्त्रिक समाजवादी पार्टीबाट प्रदेशसभा सदस्य पदका उम्मेदवार सन्तोष पाण्डेले पाँच दलीय गठबन्धन पवित्र रहेको बताए । ‘पाँच भनेकै पवित्र शब्द हो, हाम्रो पाँच दलीय गठबन्धन पवित्र गठबन्धन हो’ उनको भनाइ थियो ।