उम्मेदवार बन्जाडेलाई आयोगको २४ घण्टे स्पष्टीकरण

कात्तिक ६, अर्घाखाँची । हाम्रो नेपाली पार्टीबाट अर्घाखाँची जिल्लाको प्रतिनिधिसभा सदस्यको उम्मेदवारी दर्ता गरेका दुर्गाप्रसाद बन्जाडेलाई जिल्लाा  निर्वाचन कार्यालयले २४ घण्टाभित्र आफैं उपस्थित भएर स्पष्टीकरण दिन पत्र काटेको छ ।

पार्टीको चिह्नबाट उम्मेदवार बनेका बन्जाडेले स्वतन्त्र उम्मेदवार हुँ भनेर जनतालाई भ्रममा पारेको पाइएको भन्दै निर्वाचन कार्यालयले पत्र काटेको हाे । पत्रमा के कति कारणले कारबाही गर्नु नपर्ने हो २४ घण्टाभित्र कार्यालयमा स्वयं उपस्थित भएर स्पष्टीकरण दिन उल्लेख छ ।

हाम्रो नेपाली पार्टीबाट उम्मेदवार बनेका बन्जाडेले आफूलाई स्वतन्त्र उम्मेदवारको रुपमा प्रचार गरेको पाइएकाले स्पष्टीकरण सोधिएको आयोग कार्यालयले जनाएको छ ।

‘लौरो चिह्न स्वतन्त्र हो, म पनि स्वतन्त्र उम्मेदवार हुँ भनेर प्रचार गरेको पाइयो’ जिल्ला निर्वाचन कार्यालयका कार्यालय प्रमुख सुरेश भण्डारीले भने, ‘जनतालाई भ्रममा पार्ने काम आचारसहिंता विपरीत हुन्छ ।’

आयोगले शिक्षक, कर्मचारी तथा पत्रकारहरुलाई समेत आचारसहिंता उल्लंघन गरेको भन्दै स्पष्टीकरण सोधेको छ । पत्रकार जितेन्द्र खत्री र सूर्यप्रसाद भुसालले आचारसहिंता विपरीत दलका उम्मेदवारलाई भोट मागेको भन्दै स्पष्टीकरण सोधिएको हो ।