काठमाडौंको एक रिसोर्टबाट १८ ‘जुवाडे’ पक्राउ

११ कात्तिक, काठमाडौं । जुवा र तास खेलेको अभियोगमा काठमाडौंको नागार्जुनस्थित एक रिसोर्टबाट १८ जनालाई प्रहरीले पक्राउ गरेको छ।

बिहीबार राति ८ बजे नागार्जुन नगरपालिका-७ स्विजरल्यान्डपार्क नजिकै उदयराज पुरीले सञ्चालन गरेको दहचोक सिटी भ्यू रिसोर्टबट १८ जनालाई पक्राउ गरेको जनाएको छ । उनीहरुलाई जुवा र कौडा खेलिरहेको आरोपमा पक्राउ गरेको जिल्ला प्रहरी परिसर काठमाडौंले जनाएको छ ।

पक्राउ परेकाहरुको साथबाट ३ लाख ८२ हजार ५९५ रुपैयाँ नगद बरामद भएको छ। १५ बुक तास र १६ थान कौडा बरामद भएको उनीहरूमाथि प्रहरी वृत्त स्वयम्भूले आवश्यक अनुसन्धान गरिरहेको प्रहरीले जनाएको छ।