नवलपरासी बस दुर्घटनाका मृतकको पहिचान खुल्यो

१३ कात्तिक, काठमाडौं । नवलपरासी बर्दघाट सुस्ता पूर्वको बुलिङटार गाउँपालिका-२ मथारमा आइतबार बिहान बस दुर्घटनामा मृत्यु हुने पाँच जनाको सनाखत भएको छ ।

मृत्यु हुनेमा पाल्पाको रम्भा गाउँपालिका-१ का ४१ वर्षीय तारा विक, १७ वर्षीय विनय विक, ६२ वर्षीया धनी विक, ५८ वर्षीया देवी गाहा र स्याङ्जाको गल्याङ नगरपालिका-९ बेलचौरकी ४५ वर्षीया फूलमाया माझी रहेका छन् ।

उनीहरू सबैको घटनास्थलमै मृत्यु भएको जिल्ला प्रहरी कार्यालय नवलपरासी बर्दघाट सुस्ता पुर्वले जनाएको छ । घाइतेहरूको उपचार चितवन भरतपुरका विभिन्न अस्पतालमा भइरहेको छ । घाइतेमध्ये ३ जनाको अवस्था गम्भीर रहेको छ ।

पाल्पाको हुगीदेखी दर्शनार्थी लिएर मनकामना आउँदै गरेको ना ६ ख ७५ ८० नम्बरको बस आज बिहान ४ बजे अनियन्त्रित भई सडकबाट झण्डै एक सय मीटर तल खसेको थियो ।