दार्चुला घटनाबारे पठाइयो भारतलाई कूटनीतिक नोट

१३ कात्तिक, काठमाडौं । महाकाली नदीपारि तावाघाट–लिपुलेक सडक चौडा पार्ने क्रममा गराइएको बम विस्फोटबाट आएको ढुंगा लागेर दार्चुलाको व्यास गाउँपालिका–२, दुम्लिङका १२ वर्षीय बालक पवन महराको मृत्यु भएको घटनाबारे नेपालले भारतलाई कूटनीतिक नोट पठाएको छ ।

काठमाडौंस्थित भारतीय राजदूतावासमार्फत परराष्ट्र मन्त्रालयले आइतबार भारतलाई कूटनीतिक नोट पठाएको जनाइएको छ । गृह मन्त्रालयबाट कूटनीतिक नोट पठाउन परराष्ट्रलाई शनिबार नै पत्र पठाए पनि आइतबार मात्र कूटनीतिक नोट पठाइएको मन्त्रालय स्रोतले जनायो ।

घटनाबारे सडक निर्माणका ठेकेदार कम्पनी गर्ग एण्ड गर्गले गल्ती स्वीकार गरिसकेको अवस्थामा नोटमा पीडितलाई उचित राहत र क्षतिपूर्तिका लागि आग्रह गरिएको छ । अन्तर्राष्ट्रिय सीमा बिना जानकारी विष्फोट गराइएको भन्दै दोषीलाई कारवाही गर्न माग भइरहेका बेला परराष्ट्रले अन्तर्राष्ट्रिय सिमानामा यस्ता गतिविधि गर्दा नेपाली पक्ष र सम्बन्धित स्थानीय प्रशासन र स्थानीय बासिन्दालाई अगाडि नै जानकारी दिन आग्रह गरेको बताइएको छ।

कम्पनीको लापरवाहीले बालक महराको ज्यान गएको भन्दै राजनीतिक दलहरुले सरकारको आलाेचना भइरहेकाे बेला नोट पठाइएको हो ।सोही विष्फोटबाट आएको ढुंगाले लागेर घाइते मृतकका दिदी १४ वर्षीया सरिनाको जिल्ला अस्पतालमा उपचार भइरहेको र उनी खतरामुक्त रहेको चिकित्सकहरुले बताएका छन् ।

सोही विष्फोटबाट आएको ढुंगाले लागेर घाइते मृतकका दिदी १४ वर्षीया सरिनाको जिल्ला अस्पतालमा उपचार भइरहेको र उनी खतरामुक्त रहेको चिकित्सकहरुले बताएका छन् । कम्पनीले भारततर्फ गराइएको विष्फोटबाट ढुंगा उछिट्टिएर सीमा नदी महाकाली बारि नेपालतर्फ आउँदा बालकको ज्यान गएको थियो । विष्फोटबारे जानकारी नदिँदा बाटोमा हिँडिरहेका बेला बालक लगायतलाई ढुंगा लागेको थियो । मृतक बालकका परिवारलाई कम्पनीले आइतबार नै माफी माग्दै १६ लाख रुपैयाँ क्षतिपूर्ति समेत दिएको छ ।