डोटीका भूकम्प पीडितलाई तत्काल राहतको व्यवस्था गर्नूः प्रधानमन्त्री

२३ कात्तिक, काठमाडौं । प्रधानमन्त्री शेरबहादुर देउवाले डोटीको भूकम्प परेकाहरुलाई तत्काल उपचार र राहतको व्यवस्था मिलाउन मातहतका निकायलाई निर्देशन दिएका छन् । भूकम्पमा परी मृत्यु भएकाहरूप्रति श्रद्धाञ्जली व्यक्त गर्दै देउवाले यस्तो निर्देशन दिएका हुन् । बुधबार सामाजिक सञ्जालमार्फत नेकपा एमालेका अध्यक्ष केपी शर्मा ओली र नेकपा माओवादीका अध्यक्ष पुष्पकमल दाहालले पनि भूकम्पमा परी मृत्यु भएकाहरूप्रति श्रद्धाञ्जली व्यक्त गर्दै मृतकका परिवारजनमा समवेदना प्रकट गरेका छन् ।

प्रधानमन्त्री देउवाले प्रभावित क्षेत्रमा राहत र उद्धारमा खटिन तथा घाइतेहरूको तत्काल उचित उपचारको प्रबन्ध गर्न पनि सम्बन्धित निकायलाई निर्देशन दिएका छन् । उनले सुदूरपश्चिमको खप्तड क्षेत्र केन्द्रविन्दु बनाई गएको भूकम्पमा परी मृत्यु हुनेहरूप्रति हार्दिक श्रद्धाञ्जली व्यक्त गर्दै प्रभावित क्षेत्रमा राहत र उद्धारमा खटिन र घाइतेहरूको तत्काल उचित उपचारको प्रबन्ध गर्न सम्बन्धित निकायलाई निर्देशन दिएका हुन् ।

यस्तै नेकपा एमालेका अध्यक्ष केपी शर्मा ओलीले पनि सो भूकम्पमा परी मृत्यु भएका ६ जनाप्रति श्रद्धाञ्जली अर्पण गरेका छन् । सामाजिक सञ्जालमार्फत नै उनले शोकमा परेका परिवारजनमा गहिरो समवेदना व्यक्त गरेका छन् । नेकपा माओवादीका अध्यक्ष पुष्पकमल दाहाल ‘प्रचण्ड’ले भूकम्पमा परी ज्यान गुमाएकाहरूप्रति श्रद्धाञ्जली व्यक्त गर्दै सामाजिक सञ्जलमार्फत नै उनले घाइते तथा प्रभावित परिवारको शीघ्र स्वास्थ्यलाभको कामना गरेका छन् ।

उनले घाइतेहरूको यथाशीघ्र उद्धार, राहत र पुनःस्थापनाका लागि तत्काल पहल गर्न र प्रभावित परिवारलाई क्षतिपूर्ति दिन प्रदेश, संघीय सरकारसँग अपील समेत गरेका छन् । प्रभावितको उद्धार तथा राहतमा जुट्न मातहतका पार्टी कमिटीका सदस्यहरूलाई निर्देशन पनि दिएका छन् ।

डोटी केन्द्रबिन्दु बनाएर गएको भूकम्पमा परी ६ जनाको मृत्यु भएको थियो । पूर्वी चौकी गाउँपालिका–३ का ६ जनाको मृत्यु भएको प्रहरीले जनाएको छ । ३८ वर्षीया भगवती बोहरा, उनकी १३ वर्षीया छोरी सीता बोहरा र ७ वर्षीय छोरा हर्क बोहराको मृत्यु भएको डोटीका निमित्त प्रमुख प्रहरी नायब उपरीक्षक (डीएसपी) भोलाप्रसाद भट्टले जानकारी दिए ।