भेटवार्तामा सी र बाइडेनले भने- स्वस्थ प्रतिस्पर्धा द्वन्द्वमा परिणत नहोस्

२८ कात्तिक, काठमाडौं । अमेरिकी राष्ट्रपति जो बाइडेन र चिनियाँ राष्ट्रपति सी चिनफिङबीच इन्डोनेसियामा भेटवार्ता भएको छ । द्विपक्षीय सम्बन्ध सुधारको प्रयासस्वरूप उनीहरूको भेटवार्ता भएको न्युयोर्क टाइम्सले जनाएको छ।

रुस युक्रेन द्वन्द्वमा फरक धारणा राख्ने र विश्व राजनीतिमा एकअर्काका प्रतिस्पर्धी मुलुकका नेतृत्वबीच जी-२० सम्मेलनअघि उनीहरूको भेट भएको हो । सेमिकण्डकटरमा लगाएको प्रतिबन्ध तथा ताइवानमा अमेरिकी नीतिका कारण दुई मुलुकबीचको सम्बन्ध थप चिसिएको छ ।

भेटका क्रममा अमेरिकी राष्ट्रपति बाइडेनले दुई मुलुकबीचको प्रतिस्पर्धा द्वन्द्वमा परिणत नहोस् भन्ने पक्षमा आफू रहेको बताएका छन्। साथै उनले चीनसँग सम्बन्ध सुधारका लागि आफू तयार रहेको बताए । बाइडेनले समकक्षी सीसँग इमान्दार संवादका लागि आफू तयार रहेको भन्दै भने ‘हामीबीच नियमित आपसी संवाद जरूरी छ। म यो अवसरका लागि धन्यवाद दिन चाहन्छु ।’

यस्तै, चीनका राष्ट्रपति सीले अमेरिकी समकक्षी बाइडेनलाई दुई मुलुकबीचको स्वस्थ प्रतिस्पर्धा हुनुपर्ने र प्रतिस्पर्धा द्वन्द्वमा परिणत हुन नहुने धारणा राखेका थिए । सीले भने, ‘अमेरिका र चीनबीचको स्थिर सम्बन्धको लाभ दुई मुलुकलाई मात्रै नभएर विश्वलाई नै पुग्नेछ। म दुई मुलुकबीचको सम्बन्ध सुधारका लागि सहकार्य गर्न तयार छु ।’

सन् २०११ मा सी र बाइडेन दुवैले उपराष्ट्रपतिको हैसियतमा चीनको छेन्दुमा भेट गरेका थिए । त्यसयता उनीहरूबीच टेलिफोन तथा भिडिओ कन्फ्रेन्समार्फत् संवाद भएका थिए । भर्चुअल संवादमा सीले ताइवानमा अनावश्यक हस्तक्षेप नगर्न बाइडेनलाई चेतावनी दिएका थिए।

अमेरिकाले ताइवानलाई स्वतन्त्र राष्ट्रको रुपमा हेर्दै आवश्यक सहयोगका लागि तयार रहेको बताउँदै आएको छ । तर चीनले भने ताइवान आफ्नो अधिनस्थ भूभागको रुपमा व्यवहार गर्दै आइरहेको छ । सोही अनुरुप विश्वका कुनैपनि मुलुकले ताइवानमाथि गिद्धे नजर नलगाउन चेतावनी दिँदै आएको छ ।

अमेरिकाले गत अगस्टमा चीनमा सेमिकन्डकटर निर्यातमा प्रतिबन्ध लगाएपछि दुई मुलुकबीचको सम्बन्ध थप तिक्ततामा परिणत भएको छ।