एन्फाले २९० वटा कतार विश्वकपका लागि टिकट बिक्री गर्ने

२९ कात्तिक, काठमाडौं । अखिल नेपाल फुटबल संघ (एन्फा)ले कतारमा हुने फिफा विश्वकपका लागि २९० टिकट बिक्री गर्ने भएको छ । एन्फा अध्यक्ष पंकज विक्रम नेम्वाङको अध्यक्षतामा मंगलबार बसेको बैठकले उक्त संख्यामा टिकट बिक्री गर्ने निर्णय गरेको हो ।

नेपालले पाएको २९० टिकट एन्फा कार्यसमिति, एन्फा सदस्य संस्थाहरु तथा फुटबल स्पोनसर र शुभचिन्तकहरुलाई बिक्री गर्ने निर्णय पारित भएको एन्फाले विज्ञप्तिमार्फत जानकारी दिएको छ । विश्वकप आगामी आइतबारदेखि कतार सुरु हुँदैछ ।

यस्तै, बैठकले १३औं सागका स्वर्ण विजेता फुटबल खेलाडी प्रिजेन तामाङलाई उपचारका लागि ३ लाख रुपैयाँ दिने र यू–२० खेलाडी राकेश विश्वकर्माको उपचारमा लाग्ने सम्पूर्ण खर्च एन्फाले व्यहोर्ने भएको छ ।