पर्सामा प्रतिनिधीसभा र प्रदेससभा सदस्यको एकैपटक गणना सुरु

५ मंसिर, बीरगञ्ज ।  पर्साको क्षेत्र नम्बर १ र २ को मतगणना सोमबार दिउँसोदेखि सुरु भएको छ । बीरगञ्जको ठकुरराम बहुमुखी क्याम्पसमा दुबै क्षेत्रको प्रतिनिधीसभा र प्रदेससभा सदस्यको एकैपटक गणना सुरु भएको हो ।

प्रदेस र प्रतिनिधिसभा सदस्यको छुट्टाछुट्टै कोठामा राखेर मतगणना सुरु गरिएको पर्साका मुख्य निर्वाचन अधिकृत विनोद पोखरेलले जानकारी दिए ।

पर्सा ३ र ४ को मतगणना पनि केहि बेर मै शुरु गर्ने तयारी भइरहेको उनले जानकारी गराए । पर्सा ३ र ४ को मतगणनास्थल पोखरीया नगरपालिका ४ पोखरीया स्थित जिल्ला उच्चांगल रामदेव प्रसाद कलवार माविमा तोकिएको छ । पोखरेलका अनुसार , पर्सा जिल्लाका ४ वटै प्रतिनिधि सभा र ८ वटै प्रदेशसभा निर्वाचन क्षेत्र गरि ६८.८२ प्रतिशत मतदान भएको थियो ।

पर्सा जिल्लामा १ लाख ९४ हजार ९ सय ४ पुरुष, १ लाख ५१ ह्जार ८ महिला र अन्य १६ गरी कुल मतदाता ३ लाख ४५ हजार ९ सय २८ जना रहेकोमा आइतबार भएको निर्वाचनमा २ लाख ३८ हजार ५४ जना मतदाताले मतदान गरेका हुन् । जिल्लाका ४ वटै प्रतिनिधि सभा र प्रदेशसभा सदस्य गरि कुल १ सय ६१ जना उम्मेदवार चुनावी प्रतिस्पर्धामा छन् ।