महाकाली विवादमा भारतलाई पठाइयो कूटनीतिक नोट

२० मंसिर, काठमाडौं । सरकारले भारतलाई महाकाली नदीको बहाव नेपालतर्फ धकेलेर भारतले अनधिकृत पक्की संरचना बनाएको विरोधमा कूटनीतिक नोट पठाएको छ । परराष्ट्र मन्त्रालयले काठमाडौंस्थित भारतीय राजदूतावासलाई मंगलबार कूटनीतिक नोट पठाएको हो ।

सीमा नदीमाथि भारतले आफूअनुकूल भौतिक संंचरना बनाएको घटनामा सरकार मौन बसेको भन्दै सांसद, राजनीतिक दल तथा सर्वसाधारणले समेत सरकारको आलोचना गरिरहेका बेला मन्त्रालयले कुटनीतिक नोट पठाएको हो ।

परराष्ट्रका ती अधिकारीका अनुसार भारतलाई पठाएको कूटनीतिक पत्राचारमा नेपालको सहमतिबिना संरचना बनाइएको र यसले नेपालतर्फ क्षति पुगेको उल्लेख गर्दै सीमा क्षेत्रमा संरचना निर्माण गर्नु परे दुवै देशको सहमति र समन्वय अनिवार्य हुन पर्ने भनिएको छ । साथै सीमा क्षेत्रमा यस्ता घटना दोहोरिन नदिन कूटनीतिक रुपमा दीर्घकालीन समाधान खोज्नुपर्नेमा जोड दिइएको छ ।

महाहकालीमा भारतीय पक्षले नदीको धार परिवर्तन गरी नेपालतर्फ क्षति पुग्ने गरी तारजाली लगाएर तटबन्ध बनाएपछि स्थानीय नेपाल बजारका मानिसहरुले प्रतिवाद गरेका थिए । दुवै पक्षका मानिसहरुबीच ढुंगा हानाहान समेत भएको र केही नेपाली घाइते समेत भएका थिए ।

त्यसको विरोधमा भारतीय पक्षले महाकाली नदीको माथिको सीमा झोलुङगे पुल बन्द गरेर आवतजावत समेत बन्द गरेको थियो । त्यसपछि स्थितिले झनै तनावपूर्ण मोड लिँदै गएको छ ।

परराष्ट्रले निर्माणाधीन तटबन्ध अन्तर्राष्ट्रिय कानूनविपरीत रहेको जनाउँदै सहमतिमा मात्र निर्माण कार्य गर्न आग्रह गरिएको परराष्ट्र स्रोतले बतायो । कुटनीतिक वृत्तमा कुटनीतिक नोटलाँई विरोधको रुपमा लिइन्छ ।