पूर्व उपप्रधानमन्त्रीहरूको संसदीय यात्राः छ जना भित्रिए, छ जना बाहिरिए

२२ मंसिर काठमाडौं । मंसिर ४ मा सकिएको प्रदेश र प्रतिनिधिसभा निर्वाचन अन्तर्गत प्रत्यक्षतर्फको निर्वाचनमा १२ जना पूर्व उपप्रधानमन्त्री उम्मेदवार बनेर चुनावी मैदानमा गएका थिए । चुनावी प्रतिस्पर्धामा गएका १२ जनामध्ये ६ जनाले चुनाव जितेका छन् भने ६ जनाले पराजय भोगेका छन् ।

प्रतिनिधिसभा सदस्यको निर्वाचनमा प्रतिस्पर्धा गरेका पूर्व उपप्रधानमन्त्रीहरूमा नेपाली कांग्रेसका वरिष्ठ नेता रामचन्द्र पौडेल, प्रकाशमान सिंह, नेकपा एमालेका विष्णुप्रसाद पौडेल, रघुवीर महासेठ, टोपबहादुर रायमाझी र राष्ट्रिय जनमोर्चाका अध्यक्ष चित्रबहादुर केसीले चुनाव जितेर प्रतिनिधिसभाको यात्रालाई कायमै राखेका छन् ।

हरुवा पूर्व उपप्रधानमन्त्रीहरूमा नेपाली कांग्रेसका कृष्णप्रसाद सिटौला, सुजाता कोइराला र विजयकुमार गच्छदार यो निर्वाचनको प्रतिस्पर्धामा पराजित भए । एमालेका नेता ईश्वर पोखरेल र राष्ट्रिय प्रजातन्त्र पार्टी नेपालका अध्यक्ष कमल थापा पनि पराजित भए । यस्तै जनता समाजवादी पार्टीका अध्यक्ष उपेन्द्र यादव र लोकतान्त्रिक समाजवादी पार्टीका वरिष्ठ नेता राजेन्द्र महतो पनि पराजित भए ।

यसैगरी पूर्व उपप्रधानमन्त्रीहरूमा कांग्रेसका विमलेन्द्र निधि समानुपातिक सूचीमा बसेका छन् । उनको पनि सीट पाउने नपाउने निश्चित छैन् । माओवादी केन्द्रका वरिष्ठ उपाध्यक्ष नारायणकाजी श्रेष्ठ र वामदेव गौतम हाल राष्ट्रियसभा सदस्यमा बहालै छन् । एमाले नेता डा. भीमबहादुर रावल, माओवादी केन्द्रका प्रवक्ता कृष्णबहादुर महरा र नेकपा मालेका महासचिव सीपी मैनालीले भने यो निर्वाचनमा भाग लिएका थिएनन् ।