समानुपातिकमा भद्रगोल,कलष्टर मिलाउन सोमबारसम्मको समय

२५ मंसिर, काठमाडौं । पार्टीभित्र विवाद बढेपछि थ्रेसहोल्ड कटाएका राजनीतक दलहरुले बन्दसूचीको क्रम मिचेर समानुपातिकबाट निर्वाचित हुने सांसदहरुको नामको सूची बुझाएका छन् । निर्वाचन आयोगले राजनीतिक दलहरुले ऐन र नियम मिचेर बुझाएको समानुपातिकतर्फको बन्दसूचीको क्रम मिलाउन समेबारसम्मको समय दिएको छ ।

दलहरूले आफैं निर्धारण गरेको प्राथमिकता मिचेर प्रतिनिधिसभा र प्रदेशसभामा क्रमसंख्यामा पछाडी रहेका नामलाई अगाडी ल्याएर बुझाएका छन भने केही दलले आवश्यक संख्याभन्दा बढीको नाम पठाएका छन् । प्रतिनिधिसभाका ११० र प्रदेशसभाका २२० सदस्यको नाम दलहरूले निर्वाचन आयोगमा आइतबार बिहानसम्ममा बुझाएका छन् ।

दलहरुले पुनः सूची अनुसार क्रमसंख्या मिलाएर सोमबार पठाएपछि मंगबारदेखि आयोगले छानबिन गरी निर्वाचित भएको घोषणा गर्ने तयारी गरेको छ । आयोगले नाम बुझाउन शनिबार अपराह्न ४ बजेसम्मको समय तोकेको थियो । तर, आन्तरिक विवादका कारण कांग्रेसले आइतबार बिहान करिब सवा १ बजे मात्रै नाम बुझाएको छ । प्रतिनिधिसभाको सूची बुझाएपछि नागरिकता बोकेर कांग्रेसका केही प्रतिनिधि भने साँझदेखि नै आयोग कार्यालयमा बसिरहेका थिए । अन्य दलहरूले भने समयमै सूची बुझाएको आयोगले जनाएको छ ।

समानुपातिक समावेशी सिद्धान्त अनुसारका क्लस्टर मिलाएर दलहरूले नाम नदिएको अवस्थामा आयोगले नाम सच्याउन आइतबार र सोमबार गरी दुई दिनको समय दिने कार्यतालिका छ । त्यसका लागि आयोगले आइतबार नै दलहरूलाई पत्राचार गर्ने आयोगका सहायक निर्वाचन अधिकृत यज्ञप्रसाद भट्टराईले बताए । २९ मंसिरमा राष्ट्रपति कार्यालयमा निर्वाचनको प्रतिवेदन नै बुझाउने आयोगको तयारी छ ।

आयोगले सबै दलले कलष्टर मिचेर सूची बुझाएको जनाएको छ । एमालेले मधेसप्रदेशमा पनि प्राथमिकता क्रम मिचेर सूची बुझाएको छ । मधेसको मुस्लिम महिला क्लस्टरको एक नम्बरमा रहेकी जैनब खातुनको नाम पठाउनुपर्नेमा एमालेले दोस्रो नम्बरमा रहेकी नाजिमा खातुनको नाम पठाएको छ । तर, बन्दसूचीमा राखिसकेपछि निर्वाचित नभएसम्म हेरफेर गर्न नपाउने कानुनी व्यवस्था छ ।

कांग्रेसले पनि मधेशमा क्लस्टर नमिलाई सूची बुझाएको छ । रेखा कुमारी ठाकुरको नाम तल पारिएको आयोगको भनाई छ । त्यस्तै, माओवादीले बागमती प्रदेशमा अल्पसंख्यकतर्फ एक सीट पाएको छ । तर, दुईजनाको नाम आयोगमा बुझाएको छ । त्यस्तै, लुम्बिनीमा खस–आर्यको क्लस्टर नमिलेको अयोगले जनाएको छ ।

उपेन्द्र यादव नेतृत्वको जसपाले मधेस प्रदेशमा सात सीट पाएकोमा आयोगमा भने १० जनाको नाम पठाएको छ । सीटभन्दा बढी नाम दिएर त्रुटि भएको आयोगको भनाइ छ । नागरिक उन्मुक्ति पार्टीले क्लस्टर अनुसार नाम सिफारिस गरेको छैन भने कुनै प्रदेशमा क्रमसंख्या पनि मिचेको छ । लुम्बिनीमा खस–आर्यबाट नाम दिनुपर्नेमा थारूबाट दिएको छ । प्रदेश १ मा क्रम संख्या मिचेर नाम दिएको आयोगले जनाएको छ ।

मधेसमा कांग्रेसले अल्पसंख्यक दुई जनाको मात्र नाम दिन पाउनेमा क्रमसंख्या मिचेर तीन जनाको नाम छनोट गरेको छ  । उसले नीलमकुमारी रजक, इन्दुकुमारी साह र अञ्जना पण्डितको नाम अल्पसंख्यकमा पेस गरेको छ । एमालेले पनि मधेसमा अल्पसंख्यकको नाम क्रमसंख्या मिचेर पेस गरेको छ ।