रोनाल्डोकी प्रेमिकाले भनिन्- ‘हारको मुख्य दोषी प्रशिक्षक सान्तोष हुन्’

२५ मंसिर, दोहा । पोर्चुगलका स्टार फुटबल खेलाडी क्रिस्टियानो रोनाल्डोकी प्रेमिका जर्जिना रोड्रिगेजले विश्वकपको क्वाटर फाइनलबाट बाहिरिनुको कारण प्रशिक्षक फेर्नान्डो सान्तोष रहेको बताएकी छिन्।

कतारमा जारी विश्वकपमा पोर्चुगललाई १-० ले पराजित गर्दै शनिबार राति मोरक्को सेमिफाइनल प्रवेश गरेको छ । खेलमा रोनाल्डोलाई खेलमा दोस्रो हाफको अन्तिम समयतिर प्रवेश गराएका थिए । जर्जिनाले पोर्चुगल बाहिरिनुमा प्रशिक्षक सान्तोस मुख्य दाेषी रहेको बताइन् ।

उनले रोनाल्डोको फोटोसहित एउटा सन्देश आफ्नो इन्स्टाग्राममा पोस्ट गर्दै लेखेकी छिन्, ‘आज तिम्रो साथी तथा प्रशिक्षकले गलत निर्णय गरे, जुन साथीको प्रसंशा र सम्मानमा तिमीले धेरै शब्द खर्चिएका थियौं ।’ रोनाल्डोलाइ सुरूवाती ११ भित्र नसमेटेको भन्दै प्रशिक्षक सान्तोसको आलोचना भइरहेको छ ।

रोनाल्डोलाई गत मंगलबार स्विट्जरल्याण्डविरूद्धको प्रिक्वाटर फाइनलमा सान्तोसले पहिलो पल्ट सुरुवाती एघारबाट निकालेका थिए । त्यो खेलमा गोन्सालो रामोसको ह्याट्रिकको सहयोगले पोर्चुगलले ६–१ गोलको जित तुल्याएको थियो ।

दोस्रो हाफमा गोल फर्काउन सान्तोषले रोनाल्डोलाई मैदानमा प्रवेश गराए पनि सफल हुन सकेनन् । जर्जिनाले सान्तोसको प्रशिक्षणप्रति प्रश्न उठाएकी छन् । लेखेकी छिन्, ‘जो यसको योग्य छैन, त्यसका लागि तिमी अडिग हुन सक्दैनौं। जीवनले पाठ सिकाएको छ। आज हामीले हारेका छैनौं, सिकेका छौं ।’

यस्तै, रोनाल्डोकी दिदी एल्मा अभेइरोले भनेकी छिन्, ‘भगवानलाई सबै थाहा छ। टिमको लागि दुःख छ तर यो समय शिर उठाएर अगाडि बढ्ने बेला हो ।’

उता खेलमा पराजित भएपछि प्रशिक्षक सान्तोषले राेनाल्डाेलाइ सुरूबाटै नखेलाउँदा पश्चताप नभएकाे प्रतिक्रिया दिएका छन् ।

खेलमा पराजित भएपछि सान्तोषले भनेका छन् ‘मलाई लाग्दैन कि पश्चाताप छ । रोनाल्डो महान् खेलाडी हुन् । उनी आवश्यक पनि छन् । तर, मलाई लाग्छ यो टोली स्विट्जरल्यान्डसँग राम्रो खेलेको थियो ।’