शान्ति मिसनको पी-४ तहमा सशस्त्रका एसएसपी श्रेष्ठ छनाेट

२६ मंसिर, काठमाडौं । सशस्त्र प्रहरी बलका वरिष्ठ उपरीक्षक (एसएसपी) सुरेशकुमार श्रेष्ठ राष्ट्रसंघको दक्षिण सुडानमा सञ्चालित शान्ति मिसनको प्रोटेक्सन अफ सिभिलियन साइट कोअर्डिनेटर (पी-४ तह)मा श्रेष्ठ छनोट भएका छन् ।

सशस्त्र प्रहरी बल स्थापना भएपछिको पहिलो ब्याच सिसम-१ का सर्वोत्कृष्ट श्रेष्ठले संयुक्त राष्ट्रसंघबाट आह्वान गरिएको ग्लोबल भ्याकेन्सीमा खुल्ला प्रतिस्पर्धाबाट नाम निकालेका हुन् । श्रेष्ठ पोखरास्थित सशस्त्र प्रहरी बल हुल तथा दंगा व्यवस्थापन तालिम शिक्षालयमा कार्यरत छन् ।

राष्ट्रसंघले लिएको परीक्षामा उत्कृष्ट भएका श्रेष्ठ सिसम-१ बाट पि-४ लेभलमा छनोट हुने पहिलो अधिकृत हुन् । राष्ट्रसंघको साउथ सुडान मिसनमा रिक्त पिओसी कोअर्डिनेटर पदमा सेप्टेम्बर २०२२ मा संयुक्त राष्ट्रसंघ प्रहरी डिभिजनबाट गरिएको विज्ञापनमा नेपालको तर्फबाट एसएसपी श्रेष्ठले प्रतिस्पर्धा गरेका थिए ।

पी–४ तहमा छनोट भएका श्रेष्ठले यसअघि साउथ सुडान मिसनमा १ वर्ष एफपीयु कमाण्डर तथा शान्ति स्थापना मिसन लाइबेरिया र राष्ट्रसंघको सहयोग मिशन इराकमा नेपालको प्रतिनिधित्व गरेर काम गरिसकेका छन् ।