गण्डकीमा मुख्यमन्त्री : कांग्रेसमा किचलो, खगराजलाई गुरुङको चुनौती

१ पुष, पोखरा । गण्डकी प्रदेशमा मुख्यमन्त्रीका लागि संसदीय दलको नेता छान्ने विषयमा नेपाली कांग्रेसभित्र किचलो देखिएको छ । केन्द्रले सहमतिमा दलको नेता चयन गर्न आग्रह गरेपनि कांग्रेसकै चार आकांक्षीबीच प्रतिस्पर्धा हुने देखिएको हाे । संस्थापन पक्षभन्दा इतर पक्षले बहुमत पुर्याउने दावी गर्दै आएको छ । सांसद चयनको प्रक्रिया सकिएसँगै कांग्रेसबाट मुख्यमन्त्रीका आकांक्षीहरु दलको नेता बन्न कस्सिएर लागेका छन् ।

कांग्रेसका आकांक्षीहरुलाई नवलपुरका सभापति महेन्द्रध्वज जिसीले आफुसँग बहुमत रहेको भन्दै अरुले सहमति खोजिरहेकै बेला चुनावी प्रतिस्पर्धामा आउन चुनौती दिएका छन् । प्रत्यक्ष र समानुपातिक दुबै तर्फको नतिजा आाइसकेकाले यतिबेला सबैको ध्यान संसदीय दलको नेता चयनमा केन्द्रित देखिएको छ । जिसीका कारण गण्डकीमा पहिलो दल बनेको नेपाली कांग्रेसमा संसदीय दलको नेता सर्वसम्मत नहुने सम्भावना बढेको छ ।

केन्द्रीय सदस्य सुरेन्द्रराज पाण्डेलाई संसदीय दलको नेताका रुपमा हेरिएपनि उनलाई स्याङजा क्षेत्र नम्बर २ को क बाट निर्वाचित भोजराज अर्याल र नवलपुरका सभापति महेन्द्रध्वज जिसीले चुनौति दिएका छन् । केन्द्रमा अर्यालको नाम चर्चामा रहेपनि प्रदेशमा जिसीले आफुसँग बहुमत भएकोले प्रतिस्पर्धा गर्ने अडान दाोहोर्याइरहेका छन् ।

जिसीले शुक्रराज शर्मा नआएपछि कांग्रेसबाट आफु नै पहिलो दावेदार भएको बताइरहेका छन भने उनीभन्दा सिनियर भनिएका भोजराज अर्याल सहमतिबाटै आफु दलको नेता बन्ने बताइरहेका छन् । समस्या के छ भने यी दुबै नेता संस्थापन इतरसमूहका हुन् । जिसी र अर्याल शेखर कोइराला र महामन्त्री गगन थापा समुहका भएकाले दुइमध्ये एकलाई मात्र दलको नेतामा उभ्याउन केन्द्रीय नेताहरुको पहल आवश्यक देखिएको छ ।

यता, संस्थापन पक्षका पाण्डे भने सर्वसम्मत रुपमा आफैँ नेता बन्ने दौडमा लागेका छन् । संस्थापन पक्षबाट पनि पाण्डेलाई विन्दुकुमार थापाले चुनौती दिइरहेका छन् । सर्वसम्मत नेतृत्व चयन हुने कुरामा संस्थापन पक्षकै अर्का नेता विन्दुकुमार थापाले पनि शंका गरेका छन् । गण्डकी कांग्रेसले भने सर्वसम्मतको प्रयास हुने बताएको छ । मुख्यमन्त्रीका लागि अन्य दलहरुमा पनि उस्तै दावी छ ।

दोश्रो ठूलो दल नेकपा एमालेमा पनि दलको नेताका रुपमा खगराज अधिकारीलाई हेरिएको छ । उनी संगठन विभाग प्रमुख तथा केन्द्रीय सदस्य हुन् । प्रदेश सांसदमध्येमा पार्टीभित्र उनी सबैभन्दा माथिल्लो पदको नेता मानिन्छन् । तर, उनलाई पनि अरु सांसदहरुले चुनौती दिने बुझिएको छ । कास्कीमा खगराज र पूर्व मुख्यमन्त्री पृथ्वीसुब्बा गुरुङको छुट्टै समूह छ । उक्त समूह प्रदेशसम्म पनि झाँगिएको छ ।

उसले संसदीय दलको नेताका लागि अरुलाई अघि सार्न सक्ने धेरैको आंकलन छ । त्यसो हुँदा बागलुङका लिलाबहादुर थापा, कास्कीका भीम कार्की लगायत नेताहरुको चर्चा छ । यद्यपि उनीहरुले सार्वजनिक रुपमा आफू दलको नेता हुने बक्तब्य दिएका छैनन् । गुरुङले यसअघि नै खगराजलाई चुनौती दिँदै निर्वाचनको समयमा लमजुङले पुनः मुख्यमन्त्री पाउन सक्ने बताएका थिए । उनले जमिन्द्रमान घलेलाई अघि सार्ने बुझिएको थियो । तर, घले प्रतिस्पर्धामै पराजित भए ।

माओवादीले हरिबहादुर चुमानलाई दलको नेता बनाउन सक्छ । उनी यसअघि पनि दलको नेता भएर काम गरिसकेका व्यक्ति हुन् । त्यसो त, उनलाई चुनौती दिने नेताहरु पनि खासै निर्वाचित भएका छैनन् । यद्यपि उनी पार्टीभित्र देव गुरुङ समूह निकट मानिन्छन् । उनीविरुद्ध पनि उम्मेदवारी पर्न सक्ने माओवादीकै नेताहरुको दावी छ । तर प्रतिस्पर्धामा को आउने भन्ने कुनै संकेत गरेका छैनन् ।

माओवादीले समानुपातिकसहित ८ सीट जित्दै तेश्रो दल बनेको छ । कांग्रेससँग २७ सीट छ भने एमालेले २२ सीट पाएको छ ।समानुपातिकबाट संसदमा इन्ट्री गरेको राप्रपासँग २ सीट र एकीकृत समाजवादीको १ सीट छ । मनाङबाट निर्वाचित सांसद राजीव गुरुङ उर्फ दीपक मनाङे एकीकृत समाजवादीमा प्रवेश गरेपछि उक्त पार्टीलाई शून्य हुनबाट जोगाएका छन् । अन्य पार्टीले यहाँ संसदीय दलको नेता पाउँदैनन्, उनीहरुको संसदीय कार्यालय पनि रहने छैन । अहिले संसदीय दलको नेता बन्न सांसदहरुको काठमाडौं दौडधुप बढेको छ ।