कांग्रेसका सबै सांसदलाई बालुवाटारमा निम्ताे, दलको नेताबारे राय लिने

२ पुष, काठमाडौं । प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले संसदीय दलको नेता चयनबारे छलफल गर्न पार्टीका सबै सांसदहरुलाई बलुवाटार बोलाएका छन् । उनले दलको नेतामा धेरैले आकांक्षा देखाएपछि यसबारे सामुहिक छलफल गर्न र शुभकामना आदानप्रदान गर्न निम्ता दिएकाे बताइएको छ ।

मंसिर ४ मा सम्पन्न निर्वाचनको प्रत्यक्ष र समानुपातिकतर्फको अन्तिम परिणाम आइसकेपछि सभापति देउवाले शनिबार पहिलोपटक सबै सांसदहरुलाई प्रधानमन्त्रीको सरकारी निवास बालुवाटारमा बोलाएका हुन् । देउवाले बधाई आदानप्रदान र संसदीय दलको निर्वाचनलगायतका विषयमा छलफलका लागि शनिबार दिउँसो ३ बजे सांसदहरूको भेला बोलाएका उनको निजी सचिवालयले जनाएको छ ।

आज सबै सांसदहरुको राय बुझेपछि देउवाले पुष पहिलो साता संसदीय दलको नेता चयनको कार्यक्रम राख्ने तयारी गरेको बताइएको छ । ३ पुषमा समानुपातिक सांसदलाई प्रमाणपत्र वितरण गर्ने कार्यक्रम छ । कांग्रेस संसदीय दलको नेता चयनसँगै नयाँ सरकार गठनको गृहकार्य सुरु गर्ने सभापति देउवाको तयारी छ । समानुपातिकको प्रमाणपत्र वितरणलगत्तै संसदीय दलको नेता चयनको प्रक्रिया सुरु हुने कांग्रेस प्रवक्ता डा. प्रकाशशरण महतले नेपालबहसलाई जानकारी दिएका छन् ।

संसदीय दलको नेतृत्व लिन कांग्रेसमा आकांक्षीको दौडधुप चलेपछि सभापति देउवाले तत्काल नगराउने सोच बनाएका थिए । तर, पार्टीमा यसैका कारण विवाद आउने देखिएपछि उनी दलको नेताका लागि चुनाव गराउन तयार भएका छन् । कांग्रेस संसदीय दलको नेताका लागि ६ जनाले आकांक्षा राखेका छन् । संसदीय दलको नेता प्रधानमन्त्री हुने व्यवस्था छ ।

यसैकारण कारण कांग्रेसमा पार्टी सभापति शेरबहादुर देउवा, इतरसमूहका नेता डा. शेखर कोइराला, महामन्त्री गगन थापा, नेता रामचन्द्र पौडेल, डा. शशांक कोइराला र प्रकाशमान सिंहले दलको नेता बन्ने चाहना राखेका छन् । संस्थापन पक्षले सभापति देउवालाई संसदीय दलको नेताका रूपमा अगाडि सारे पनि संस्थापनइतर समूह अझै अलमलमै छ । इतर समूहको आधिकारिक उम्मेदवारबारे आकांक्षीबीच सहमति बनिसकेको छैन । नेता डा. कोइराला र महामन्त्री थापा आकांक्षी रहेपनि उनीबीचमा नै सहमति भएको छन्।