एमालेतिर गएर सरकार बनाउने कुरा झुट हो: अध्यक्ष प्रचण्ड

४  पुष, नारायणगढ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेकपा एमालेसँग मिलेर सरकार बनाउने भन्ने विषयमा सत्यता नभएको बताएका छन् । उनले निर्वाचनको परिणामपछि माओवादी एमालेसँग मिल्छ र सरकार बनाउने विषयमा अहिलेको सत्ता गठबन्धनलाई छोडछ भन्ने कुराको हल्ला बजारमा आएपनि यो सम्भावनाहिन हल्ला भएको बताएका छन् ।

प्रेस सेन्टर, नेपाल चितवनको आयोजनामा सोमबार भरतपुरमा आयोजित पत्रकार सम्मेलनमा अध्यक्ष्ँ प्रचण्डले आगामी सरकार वाम लोकतान्त्रिक गठबन्धनकै हुने बताए । उनले अहिले औपचारिक बैठक नबसेपनि चाँडै गठबन्धनको बैठक बस्ने र सरकार गठन लगायत शक्ति बाँडफाँटका विषयमा छलफल गरेर गठबन्धनको सरकार बन्ने र अघि बढ्ने बताए ।

प्रचण्डले राष्ट्रपति, उपराष्ट्रपति, प्रधानमन्त्री, सभामुख र उपसभामुख लगायतका पदहरुमा सहमति खोज्न बाँकी नै रहेको भन्दै शक्ति बाँडफाँटमा मात्रै छलफल केन्द्रित रहेको जानकारी दिए । उनले बाम लोकतान्त्रिक गठबन्धनमा रहेका र बाहिरका दलहरुसँग पनि छलफल हुने सबैको सहमति जुटाएर राष्ट्रपतिले दिएको सीमा भित्रै नयाँ सरकार बनाउने दावी गरे ।

अहिलेसम्म गठबन्धन दलबीच व्यक्तिकेन्द्रित छलफल नभएको उनको भनाइ छ । एमालेसँग मिलेर सरकार बनाउने कुरा बाहिर आए जस्तो कुनै सत्यता नभएको स्पष्ट पार्दै प्रचण्डले भने, ‘बाहिर आएजस्तै औपचारिक र आधिकारिक रुपमा कुराकानी भएको छैन । सरकार गठबन्धनबारेमा एमालेलगायतका दलहरुसँग छलफल हुन नौलो कुरा पनि हैन । छलफल सबैसँग भइरहेकै छ ।’

उनले सरकार गठनबारे कांग्रेस,एमाले लगायत सबैजसो दलबीच पनि कुराकानी भइरहेको भन्दै स्वतन्त्र सांसदहरुसँग पनि आफ्नो कुरा भइरहेको बताए । कतिपय व्यक्तिहरुले स्वतन्त्र व्यक्तिलाई राष्ट्रपति बनाउने कुरा उठाएपनि योबारे कुनै दल र नेताबीच छलफल नभएको उनको भनाइ छ । प्रचण्डले प्रधानमन्त्रीको विषय पनि चाँडै टुंगो लाग्ने बताए । उनले भने,‘जो प्रधानमन्त्री भएपनि हामी सल्लाहबाटै मिलाउँछौँ ।’