बामपन्थी सरकारको कुरा हामीलाई घर न घाटको बनाउने षडयन्त्र होः अध्यक्ष नेपाल

४ पुष, काठमाडौं । नेकपा एकिकृत समाजवादीका अध्यक्ष माधवकुमार नेपालले सरकार बनाउने विषयमा बामपन्थी दलको कुरा गरेर बामपन्थीलाई नै घर न घाटको बनाउन षडयन्त्र भइरहेको बताएका छन् । अध्यक्ष नेपालले अहिलेको परिस्थितिमा बामहरू एक भएर सरकार बन्न सक्ने अवस्था नरहेको भन्दै यो बेला बाम शक्तिको कुरा गरेर अल्मल्याउन खोज्नु भनेको बामपन्थीलाई सिध्याउने षडयन्त्र भएको दावी गरेका छन् ।

पार्टीबाट निर्वाचित सांसदहरूको शुभकामना कार्यक्रममा बोल्दै उनले अहिले वामपन्थी दलहरू एक भएर सरकार बनाउने हल्ला चलाए पनि त्यो सम्भव नभएको र त्यो बाटमा लाग्दा परिस्थिति झन प्रतिकुल हुने बताए । एमाले अध्यक्ष केपी शर्मा ओलीतिर संकेत गर्दै अध्यक्ष नेपालले वामपन्थी सरकारको मसला फालेर जनता अल्मल्याउने कुरा गर्नु मुर्खता हुने बताए । वामपन्थीको सरकार बनाउनेतिर लागे पहिले जस्तै (नेकपा सरकार) भएको कुरा गुमाएर घर न घाटको हुने उनको बनाइ छ ।

अध्यक्ष नेपालले आफू र माओवादी अध्यक्ष पुष्पकमल दाहालबीच टेलिफोन संवाद भएको र सरकार बनाउने विषयमा आज पनि छलफल भएको जानकारी दिए । उनले अन्य दलमा संसदीय दलको नेता छानिएपछि सरकार बनाउने विषयलाई निर्णायक मोड लिने पनि उल्लेख गरे । साथै कांग्रेस सभापति शेरबहादुर देउवासँगको छलफल पछि सरकार गठनको समीकरण टुंगो लाग्ने पनि उनले जानकारी दिए ।

उनले सत्तारुढ गठबन्धनका नेताहरुमा अहंकार देखिन नहुने र जस्तो परिस्थिति आएपनि सामना गर्न तयार रहनुपर्ने बताए । उनले उनले भने, ‘हामीले अहिलेकै गठबन्धनलाई कायम राख्ने छौं । गठबन्धन दलका नेताहरुले संगसँगै जाने सहमति पनि गरेका छौं । तर, गठबन्धनभित्रकै दलहरुका नेताहरुमा अहंकार पलाउनु भएन । आउने जस्तोसुकै स्थितिको सामना गर्न तयार हुनुपर्छ ।’

उनले सत्ता गठबन्धनभित्र शक्ति बाँडफाँटका विषयमा औपचारिक छलफल सुरु नभइसकेको बताए । कतिपयले वामपन्थीमात्रै र गैरवामपन्थीको सरकार बन्न सक्ने चर्चा गरेको भन्दै उनले त्यसको अर्थ नभएको बताए । यो प्रतिनिधिसभा निर्वाचनबाट कांग्रेसलाई फाइदा भएको टिप्पणी गर्दै नेपालले अरु जम्मैले नोक्सानी बेहोर्दा नेपाली कांग्रेसले फाईदा लियो तर यो स्वभाविक भएको बताए ।