भ्रष्टाचार र हत्याको मुद्दा खेपिरहेकालाई संसदमा रातो कार्पेट !

७ पुष, काठमाडौं । अन्य मुलुकमा हत्या र भ्रष्टाचार जस्तो जघन्य अपराधमा मुछिएकाहरु जेलमा सजाय भोगिरहेका हुन्छन् । उनीहरुलाई सर्वाजनिक महत्वका पदमा जाने अधिकारको कुरै छाडौ सामान्य सरकारी काम काजका लागि पनि अयोग्य ठहरिन्छ । तर, नेपालमा भने यस्तो अभियोग लागेर मुद्दा खेपिरहेको व्यक्तिलाई सांसदका रुपमा नीति निमार्ण गर्ने संसदमा रातो कार्पेट विछ्याएर स्वागत गरिएको छ ।

बिहीबार भ्रष्टाचार अभियोगमा विशेष अदालतमा मुद्दा खेपिरहेका कांग्रेस सांसद टेकबहादुर गुरुङ र हत्या अभियोगमा नेपाल प्रहरीको फरार सूचीमा रहेका एमाले सांसद लक्ष्मी महतो कोइरीले प्रतिनिधिसभा सदस्यको रुपमा सपथ लिएका छन् । उनीहरुले अरुले जस्तै बिहीबार ज्येष्ठ सदस्य पशुपतिशमशेर जबराबाट शपथ प्रतिनिधिसभा सदस्यको शपथ लिए ।

कानुनअनुसार गुरुङ स्वतः निलम्वनमा परेका व्यक्ति हुन । उनले शपथ लिन नपाउने थिए । यसविपरीत बिहीबारको शपथमा उनीलाई सहभागी गराइएको छ । यस्तै सशस्त्र प्रहरीका असई थमन बिक हत्या अभियोगमा महतो प्रहरीको फरार सूचीमा रहेका व्यक्ति हुन् ।

उनलाई पनि एकै लहरमा राखेर शपथ गाइएको छ । कांग्रेस नेता तथा पूर्वमन्त्री गुरुङ मनाङबाट प्रतिनिधिसभा सदस्यमा चुनिएका थिए । तत्कालीन प्रधानमन्त्री सुशील कोइरालाको नेतृत्वमा श्रम तथा रोजगार राज्यमन्त्री भएका उनले काठमाडौं फनपार्कको जग्गा भाडामा लगाउँदा भ्रष्टाचार गरेको अभियोग लागेको थियो भने अहिले पनि उनी विशेष अदालतमा मुद्दा खेपिरहेका छन् ।

अख्तियारले उनीसहित १६ जनाविरुद्ध माघ २०७५ मा विशेष अदालतमा दायर गरेको मुद्दा विचाराधीन छ । गुरुङलाई मात्रै ३१ करोडको बिगो तोकिएको छ । सरकारी सम्पत्ति हिनामिना गरेको अभियोग लागेका उनी पनि संसद् सदस्यमा चुनिएका हुन् । २०७२ को मधेस आन्दोलनमा सशस्त्र प्रहरीका सहायक निरीक्षक थमन विकलाई खेतमा लखेटी–लेखेटी हत्या गरेको आरोपमा कोइरी प्रहरीको फरार सूचीमा रहेका छन् ।

निर्वाचनको मुखमा जसपा छाडेर एमाले प्रवेश गरेलगत्तै उनी महोत्तरी–१ बाट एमालेका उम्मेदवार बनोका थिए । सीट बाँडफाँट गर्दा महोत्तरी–१ एमालेको भागमा परेपछि कोइरी एमाले नै प्रवेश गरेर चुनाव लडे थिए । गठबन्धनको सहयोगीका रूपमा जसपाको समेत समर्थनमा उनी विजयी भएका हुन् । संविधान जारी हुनुअघि मधेसमा सुरु भएको आन्दोलनमा सुरक्षार्थ खटिएका विकको हत्या कोइरीकै योजनामा भएको अभियोग छ ।

२०७२ भदौ २५ मा आन्दोलनकारीको कुटाइबाट गम्भीर घाइते विकलाई उपचारका लागि जनकपुर लैजाने क्रममा एम्बुलेन्सबाट थुतेर हत्या गरिएको थियो । घटनापछि थमनका दाजु प्रेमबहादुरले कोइरीसहित २८ जनाको नाम किटेर जाहेरी दिएका थिए । यो अनुसार जिल्ला अदालत महोत्तरीबाट २०७६ असोज २ मा कोइरीलाई १ लाख रुपैयाँ धरौटीमा छुटेका थिए ।

यो अदालतको आदेशविरुद्ध पुनरावेदन परेपछि जनकपुर उच्च अदालतले २०७७ मंसिर १९ मा जिल्लाको आदेश उल्टाउदै कोइरीलाई थुनामै राखेर मुद्दा अघि बढाउन आदेश दिएको थियो । त्यसपछि केही समय फर भएर सार्वजनिक भएका उनले कानूनी सफाई पाएका छैनन् । बरु उल्टै कानुन निर्माण गर्ने प्रतिनिधिसभाको सदस्य भएर संसद छिरेका छन् ।