फेरियो समीकरणः बालुवाटार सुनसान, बालकोट भरिभराऊ !

१० पुस, काठमाडौं । सत्ता गठबन्धनमा सहमति नजुटेपछि आजै बाम सरकारबाट प्रधानमन्त्रीसहित सरकारका लागि दावी पेश गर्न नेकपा एमालेका अध्यक्ष केपी शर्मा ओलीको निवास बाटकोटमा कांग्रेसबाहेकका दलहरु जम्मा भएका छन् । नेकपा माओवादीका अध्यक्ष पुष्पकमल दाहाल ‘प्रचण्ड’ एमालेका अध्यक्ष ओलीको निवास भक्तपुरस्थित बालकोटमा पुगेपछि चार दलबीच छलफल सुरु भएको छ ।

एमाले अध्यक्ष ओली, माओवादी केन्द्रका अध्यक्ष पुष्पकमल दाहाल ‘प्रचण्ड’, राष्ट्रिय स्वतन्त्र पार्टीका सभापति रवि लामिछाने र जनता समाजवादी पार्टीका नेता अशोक राईलगायतका नेताहरुबीच छलफल सुरु भएको हो । यसअघि ओलीले राप्रपा नेपालका अध्यक्ष राजेन्द्र लिङ्देन र राष्ट्रिय सवतन्त्र पार्टीका अध्यक्ष रवि लामिछानेसँग छलफल गरेका थिए ।

प्रधानमन्त्रीको सरकारी निवास बालुवाटारको बैठकबाट बाहिरिएका प्रचण्ड ओलीलाई भेट्न बालकोट पुगेका हुन् । राष्ट्रपति विद्यादेवी भण्डारीले सरकार गठनका लागि दिएको समय आइतबार अपरान्ह ५ बजे सकिँदैछ । माओवादी अध्यक्ष प्रचण्ड प्रधानमन्त्री बन्ने प्रयासमा छन् । त्यसका लागि हालको सत्तारुढ गठबन्धनमा सहमति नजुटेपछि उनी एमालेसँग सहकार्यका लागि बालकोट गएका हुन् ।

हाल छलफलमा रहेका दलहरुले सांसदहरुलाई हस्ताक्षर गर्न पनि भनेको बताइएको छ । प्रचण्डलाई प्रधानमन्त्री दिएर एमालेले राष्ट्रपति र सभामुख राख्नेबारे छलफल भइरहेको छ । अहिले छलफलमा रहेका दलहरुमा एमालेसँग ७८ र माओवादीसँग ३२ रास्वपासँग २० र राप्रपासँग १४ सीट रहेको छ । यी दल मिलेर सरकार बनाउन बहुमत पुग्छ । बहुमत पुग्ने भएपछि सरकार गठनबारे छलफल सुरु भएको हो ।